Wednesday, December 31, 2008

අර්ධ ශතකය, බෝඩිම, සහ සමුගැනීම

මේ මගේ ජයග්‍රාහී අර්ධ ශතකය. හරියටම 2008ට බ්ලොග් සටහන් පනහයි. අර්ධ ශතකයක් එක්කම කියන්න තව දෙයක් තියෙනවා.
මම උදේ හවස දුම්රියේ යන එක නතර කළා. දැන් ඉන්නෙ බෝඩිමක. හැව්ලොක්, කොළඹ 05. කැම්පස් එකට පයින් යන්න පුළුවන් දුර. දැන් ඇවිත් සතියක් විතර වෙනවා. ආයෙමත් යාළුවොත් එක්ක පරණ ආතල් ජීවිතේට සෙට් වෙන්න පුළුවන්. :) බම්බු, සිලියා, රෙපා, රූකඩයා, සරා, කන්නසාමියා, ඇච් ඇස්, දොරේ, දයා, පුලා, ඉම්බා, වැංකා, රානි, පුන්නා, කතා, ගරූ, පොලා සහ තඩියා ඇතුළු මෙකී නොකී කැම්පස් යාළුවොත් එක්ක ආයෙ වල බහින්න පුළුවන් -- මීටත් වඩා ආතල් එකක් කොයිද?

හවසට ගෙදර යන කාලෙ හවස 5.30 දුම්රියේ යන්න 5ට කැම්පස් එකෙන් පිටත් වෙන්න ඕනා. ඒක තමයි අමාරුම කාරිය. ඒත් දැන් එහෙම නෑ. රෑ 8 වෙනකම් කැම්පස් එකේ ඉන්න පුළුවන්. :) බැචාල සෙට් වුණාම වෙලාව ගතවෙනව දැනෙන්නෙත් නෑ. කැම්පස් එක තියෙන්නෙ අධිආරක්ෂිත කලාපයක නිසා රෑ අටෙන් පස්සෙ ඉන්න බෑ. :( එහෙම නොවුනා නං සිරාම ආතල් එක. ඒත් ඉතිං ආරක්ෂාවත් වැදගත්නෙ.

දිනපතා දුම්රිය මගියා කාලෙ දවසෙ වෙලාවෙන් පැය පහක්ම නාස්ති වුණා. එක ගමනකට පැය දෙකහමාරක්! හැබැයි සිරාම මගී යාළුවො සෙට් එකක් සෙට් වුණා. කැම්පස් වගේම ආතල් අපි කෝච්චියෙදි ගන්නෙ... මේ බ‍ටර් ගාන්නෙ එයාල මේක කියවන නිසා. :D දැන් farewell party එකත් දීල ඔක්කොම close කරල තියෙන්නෙ. හැබැයි ජනවාරි පළවෙනිදා ආයෙම සෙට් වෙන්නයි හිතාගෙන ඉන්නෙ. :)
---
හැව්ලොක් කාක්කොත් අපරාදෙ කියන්න බෑ මාව සාදරයෙන් පිළිගෙන තිබුණා. :D ඒක දැනගත්තෙ බෝඩිමට ආවම ලැප්ටොප් බෑග් එකේ පැත්තකින් සිරස්ව පහළට බේරිලා ගිය සුදුපාට පැල්ලම දැක්කම. ඒක පිරිසිදු කරන්න වෙච්ච මහන්සිය මමයි දන්නෙ -- හැව්ලොක් කාක්කව අල්ලල උගේ අධෝමුඛය තංගුස් නූලෙන් මහන හැටි මෙනෙහි කරමිනුයි මම බෑග් එක හේදුවෙ!
---
ඊළඟට කියන්න තියෙන්නෙ ශෝකජනක කතාවක්. අපේ දෙවන වසර පළමු සමාසිකය සඳහා විභාගය ජනවාරි මාසෙ පටන් ගන්නව. ආතල් ඔක්කොම මාසෙකට suspend කරන්න වෙනවා. වල බැහිල්ල නතර කරල 'කුප්පි සරණං ගච්ඡාමි' කියලා අද ඉඳල පාඩම් කරන්න සෙට් වෙනව. ඒ නිසා බ්ලොග් ලිවිල්ලෙන් තාවකාලිකව සමුගන්නවා... :(



එහෙනම්, දයාබර කියවන්නෙනි...
මගේ බ්ලොග් මිතුරනි...
සෞභාග්‍යමත් සුභ නව වසරක්...
හෙටින් එළැඹෙන 2009!

මේ වසරේ මාත් සමඟ රැඳී සිටියාට ඔබට මගේ හදපිරි ප්‍රණාමය!

යන්නාං... ටටා... :)

෴සමීර ශාකුන්තල | Sameera Shaakunthala෴

Tuesday, December 30, 2008

ආසයි මේකත් මස් කරන්න

මේ තියෙන්නෙ මං assignments, projects කරන, මම ඉගනගන්න, බ්ලොග් ලියන්න පාවිච්චි කරන ලැප්ටොප් යන්ත‍රේ. පසුගියදා මේකෙ වගකීම් කාලසීමාව අවසන් වුණා. මාත් ඉතිං අවුරුද්දක් තිස්සෙ පෙරුම් පුරාගෙන හිටියෙ මේ මොහොත උදා වෙනකං. පිලිප්ස් ස්කුරුප්පු නියනකුත් අරගෙන මං වැඩේට බැස්සෙ හරිම ආසාවෙන්.









පංකාව වටේ දූවිලි විමානයයි. අවුරුද්දක් තිස්සෙ සුද්ධ කරල නැහැනෙ. දූවිලි ‍බැඳෙන්නෙ නැතුව තියේවියැ; අපට කොහෙද AC කරපු කාමර? කොහොම හරි මද්‍යසාර ස්වල්පයක් පාවිච්චි කරල පරිස්සමින් පංකාව වටේ පවිත්‍ර කළා. දැං බලන්න ලස්සනයි. බබා වගේ.

ඔය CPU එකේ ඉඳල පංකාව පැත්තට යන මහත තඹ කම්බිය තමයි තාප ගිල්ලුමයි (heat sink) පංකාවයි අතර ප්‍රධාන තාප සන්නයන මාධ්‍යය. බලමුකො ඒකෙත් හැටි! සාමාන්‍ය desktop පරිගණකයක heat sink හදන්නෙ ඇළුමිනියම් මිශ්‍රලෝහයෙන් (alloy). මේකෙ තඹ! (තඹ ඇළුමිනියම් වලට වඩා මිලෙන් වැඩියි)

ඔය කළුපාට දිලිසෙන සිහින් වයරය තමයි Wi-Fi ඇන්ටෙනාව.

මම ලැප්ටොප් පරිගණකයක නිවෙස්නය (housing) විවෘත කරපු පළවෙනි වතාව තමයි මේක.

෴සමීර ශාකුන්තල | Sameera Shaakunthala෴

Sunday, December 28, 2008

එය මෙසේ නිමා විය!

නාග පැටික්කයි මායි තව ChanServ කියල තරුවෙකුයි විතරයි ඉතුරු වුණේ. අන්තිමේ අපි තමා මැරතන් පොරවල්!



෴සමීර ශාකුන්තල | Sameera Shaakunthala෴

Saturday, December 27, 2008

මගේ බ්ලොග් ලිවිල්ල හා අළුත් කඩු හරඹය

සිංහලෙන් බ්ලොග් ලියන වැඩේට මං තාම අළුත් වුණත් මගේ බ්ලොග් ලිවිල්ල දැන් ටිකක් පරණයි. මුලින්ම මේ වැඩේ පටන් ගත්තෙ 2006 අවුරුද්දෙ කඩ්ඩෙන්. වෙලාවකට හිතෙනවා මෙතන තිබිච්ච පරණ කඩු ෆයිට් ටික මකල දැම්මෙ අපරාදෙ කියල. ඒ කාලෙ මැස්සෙක් මදුරුවෙක්වත් නෑ මගෙ බ්ලොග් එක පැත්ත පලාතෙ. ඉතින් වැඩේ නැවැත්තුවා.

මේ අවුරුද්දෙ මැද විතර UCSC LODGE පටන් ගත්තම ඒකෙ මම ඉගෙනගන්න තාක්ෂණික දේවල් බ්ලොග් එකකින් ලියන්න පටන් ගත්තා කඩ්ඩෙන්. UCSC LODGE එක UCSC ශිෂ්‍ය සංගමයෙ වැඩක් නිසා UCSC එකේ මගේ බ්ලොග් එක කියවන්න අය කොහොමත් ඉන්නවා. ඉලක්කය junior batch එකේ අය සහ UCSC ඉදිරි පරම්පරාව. ඒ අයට තමන්ගෙම කියල කියන්න පුළුවන් තැනක ප්‍රයෝජනවත් යමක් ඉතිරි කරල යන එකයි මගේ UCSC LODGE බ්ලොග් එක ලිවීමේ අරමුණ. ඒ නිසා මම ඒකෙ ලියන්නෙ අනෙක් අයට ප්‍රයෝජනවත් වෙන තාක්ෂණික දේවල්ම පමණයි. ඒක දෙමළ, මුස්ලිම් (සිංහල නොදන්න අය) අයටත් කියවන්න පුළුවන් වෙන්න කඩ්ඩෙන්ම ලිව්වා. ඔන්න ඔය කාරණා නිසා හිතට එන අනං මනං ඒ බ්ලොග් එකේ ලිව්වෙ නැහැ. ඒවයින් කාටවත් ප්‍රයෝජනයක් නැහැනෙ.

ඊළඟට ශාකුන්තලගේ සටහන් පොත. ඒ කියන්නෙ ඔයා දැන් කියවමින් ඉන්න එක. අහම්බෙන් ‍වගේ සිංහල වචනයක් සිංහල අකුරෙන්ම ගූග්ල් එකෙන් හොයද්දි තමයි මම සිංහල බ්ලොග් කියවන්න සෙට් වුණේ. Ubuntu වල සිංහල අවුල විසඳගන්න හැටි UCSC LODGE එකේ සිංහලෙන්ම ලිව්වට පස්සෙ තමයි මම මුළුමනින්ම සිංහල බ්ලොග්කරුවෙක් වුණේ. ඊට පස්සෙ දන්න සිංහලෙන්ම ලියන්න මේ බ්ලොග් එක හැදුවා. මේ බ්ලොග් එක මම තියාගෙන ඉන්නෙ කප්පාදු කරපු ක්‍රෝටන් පාත්තියක් වගේ. අනම් මනම් පිස්සු විකාර නැතුව පුළුවන් තරම් ලස්සනට පිළිවෙළකට මේක තියාගන්නයි උත්සාහ කරන්නෙ. ඒත් ඉතින් ඔය න්‍යායෙන් පිට පැනපු තැන් නැතුව නොවෙයි.. හරියට ‍මේ සටහන වගේ :D . කොහොම කොහොම හරි මේකෙත් පිස්සු කෙළින්න බෑ.

ඊළඟ එක තමයි කැම්පස් ආතල් බ්ලොග් එක. අපේ බැචාලා ගන්න ආතල්.. සරසවි කුරුටු ගී.. ඔන්න ඕව ලියවෙන තැන තමා ඒක. ඒකෙ ඕන දෙයක් ලියන්න පුළුවන් තමයි.. ඒත් ඒක අපේ බැචාලා අතර පමණයි. ඒකත් හරියන්නෙ නෑ.

තව ටිකෙන් අමතක වෙනවා.. මිනි බ්ලොග් මැරතන් වලට හදපු එක.. Hayabusa the Marathoner. මේකෙ කඩු ගතියක් තිබුණට වැඩ සුද්ධ සිංහලෙන්. ඒ වෙලාවට බලමුකෝ.

ඔය නිසා මගේ ඔළුවට එන අනංමනං අදහස් ලියන්න මම අද අළුත් බ්ලොග් එකක් හැදුවා. ඒ බ්ලොග් එකේ නමේ, URL එකේ ඉඳල අගට යනකම් හැම දෙයක්ම පිස්සු විකාර කියල කෙනෙක් කිව්වොත් මම විරුද්ධ වෙන්නෙ නැහැ. කැමති නම් ගිහින් බලන්න, Shaakunthala's Geekbook. දැන් සිංහලෙන් ලියන්න පටන් අරගෙන නිකං කඩ්ඩත් අමතක වේගෙන යනව වගෙ නිසා ඒක ලියන්නෙ කඩ්ඩෙන්. ඒකෙ ලියනව ඔය අනංමනං බහුබූත. ඒවයින් කාටවත් ප්‍රයෝජනයක් නෑ. නමුත් කොහෙ හරි ලියල තියන්න ඕන කියල හිතෙන අච්චාරු සටහන් ඒකෙ ලියනව.

මේ සටහන කියවූ ඔබට මගේ හර්දයාංගම ඉස්තූතිය!

෴සමීර ශාකුන්තල | Shaakunthala෴

Friday, December 26, 2008

මහා විනාශයක් අතළඟ?



මොකද හිතෙන්නේ? බයයි බයයි වගේද? බය වෙන්න එපා. සියල්ල අනිත්‍යයි. :)

෴සමීර ශාකුන්තල | Sameera Shaakunthala෴

Tuesday, December 23, 2008

ASCII version of Star Wars

මේක මහ පිස්සු වැඩක් කියල කෙනෙකුට හිතෙන්න පුළුවන්. ඒත් බලන්න වටිනවා. කරලම බලන්න.

වින්ඩෝස් පාවිච්චි කරනවනම් මෙහෙම කරන්න. Start --> Run වෙත යන්න. එහි පහත දැක්වෙන විධානය යතුරුලියනය කර Enter කරන්න.

telnet towel.blinkenlights.nl 23



ලිනක්ස් පාවිච්චි කරනවනම් terminal එකක් විවෘත කරගෙන පෙර කී විධානයම ලබා දෙන්න.



---

අපූරුයි නේද? ASCII text මගින් දර්ශනය වන චලනචිත්‍රයක්. මේක හදපු කෙනා මේ වෙනුවෙන් සෑහෙන මහන්සියක් වෙන්න ඇති. IPv6 සංස්කරණයේ වර්ණත් තියෙනවලු.

෴සමීර ශාකුන්තල | Sameera Shaakunthala෴

Sunday, December 21, 2008

සියළුම බෞද්ධයන් හට දැනුම් දීමයි!

මා පාසැලේ 8 වන ‍ශ්‍රේණියේ ඉගෙනුම ලබමින් සිටි කාලයේදී දිනක් මිතුරන් මාර්ගයෙන් මට එක්තරා පත්‍රිකාවක් ලැබුණි. මම එය කියවා "මේ බොරුවක්" යන වදන පමණක් පවසා එය ඉවතලීමට සැරසුණත් මිතුරන්ගේ විරෝධය හේතුවෙන් එය ඉවත නොදමා ඔවුන්ටම දුනිමි.
---
ඒ පත්‍රිකාවම පසුගිය දිනක මට විද්‍යුත් තැපෑලෙන් ලැබී තිබුණි. අහෝ සම්බුද්ධ ධර්මයට කර ඇති අපහාසය! තත්වය නරක අතට හැරී ඇත්තේ දැන් මෙයට විද්‍යුත් තැපෑලත් උදව් වීම නිසාවෙනි. විද්‍යුත් තැපැල් මගින් ඉතා පහසුවෙන් යම් පණිවුඩයක පිටපත් සිය ගණනක් එක්වර බෙදාහැරීමට ඇති හැකියාව නිසාවෙනි.


බුද්ධාගමට විහිළු කරන අයට නිසි දඬුවම් දීමක් ගැන මෙහි සඳහන් වෙයි. මා අසා ඇති අන්දමින් වෙනත් ආගම්හි දක්නට ලැබෙන අන්දමින් විරුද්ධවාදීන්ට දඬුවම් දීම බුදු දහම අනුමත කරන්නේ නැත. මේ කියන නාග රාජයා දඬුවම් දෙන්නෙක් නම් Buddha Bar වැනි දේවල් තවමත් පවත්වාගෙන යන්නේ කෙසේද? එනයින් මේ පත්‍රිකාවම ලොකු විහිළුවක් නොවේද?

මේ පත්‍රිකාව නොසලකා හරින අයට කරදර වේ ලු. ප්‍රචාරය කරන අයට සිතන දේ ඉෂ්ට වේ ලු. මේ පත්‍රිකාවේ ඇති අතාර්කික කරුණු එකින් එක විග්‍රහ කරන්නට කාලයක් මට නැත. කිව යුතු එකම දේ නම් මෙවන් බොරු පත්‍රිකා වලට රැවටී නොමග යන්නන් දැනුවත් කර ඔවුන්ට සත්‍යය වටහා දිය යුතුය යන්නයි.
---
ඔබටත් මෙම පත්‍රිකාව විද්‍යුත් තැපෑල මගින් ලැබී ඇත්නම් එය මකා දමන්න පසුබට වෙන්න එපා. නොමග ගියවුන් දැනුවත් කරන්න. මෙය ප්‍රචාරය නොකළා කියා ඔබට දෂ්ඨ කරන කළු නාගයෙක් කොතැනකවත් නොවේ.

If you have received this leaflet, do not hesitate to discard it. And also help people to understand what the truth is.

තෙරුවන් සරණයි!

෴සමීර ශාකුන්තල | Sameera Shaakunthala෴

Wednesday, December 17, 2008

ජපන් කෙල්ලගෙන් ප්‍රවේශම් වන්න

මේ තවත් වයිරසයක් ගැන කතාවක්. මේ සටහන ලියන්නෙ කවුරුහරි මේ ගැන නොදන්න කෙනෙකුට තාක්ෂණික අවබෝධයක් ලබා දෙන්නත් එක්කයි. කොතෙක් දුරට සාර්ථක වේදැයි දන්නෙ නැහැ. මෙන්න මේ සටහනත් කියවල නැත්තම් කියවන්න.
---
මම ළඟදි දවසක යාළුවෙකුගෙ පරිගණකයක් පාවිච්චි කරද්දි දැක්ක දෙයක් මේක.
Windows Task Manager, Registry Edtor, Windows Configuration හා Command Prompt ඇතුළු වැදගත් utility ක්‍රමලේඛ ගණනාවක් ක්‍රියාත්මක කළ සැනින් වැසී යනවා. මේක වෙන්නෙ ගොඩක් වෙලාවට වයිරස වලින් කියල ආයෙ කියන්න ඕන නැහැනේ. මම ඉතින් උත්සාහ කළා මේක අයින් කරන්න.

ඒ පරිගණකයේ AVG Antivirus ස්ථාපනය කරල තිබුණත් වයිරසය මගින් AVGත් වසා දමනවා. ටිකක් වැඩ දන්න කෙනෙක් හදපු එකක් වගේ :( . ඉතින් මම උත්සාහ කළා ඒ වෙලාවෙ වැඩ කරන processes ටික හොයා ගන්න. Windows Task Manager දුවවන්න බැහැනෙ.. මම උත්සාහ කළා Task Manager හෝ Process Explorer යෙදුමක් අන්තර්ජාලයෙන් සොයා ගන්න. ඉතින් මම ඒ සෙවුම් වදන් යොදලා Google මගින් සොයා බැලුවා. මෙන්න browser එකත් ඉවත් වුණා! ඒකෙන් මම තේරුම් ගත් දෙය තමයි වයිරසය විසින් පරීක්ෂා කරන්නේ එක් එක් window එකේ මාතෘකාව (title) මිසක් ක්‍රියාකාරී ගොනු නාමය (executable file name) නොවන වග. මාතෘකා තීරුවේ Task Manager වගේ එයා අකමැති වචන තිබුණොත් එයා ඒ window එකට අදාළ ක්‍රමලේඛය බලෙන් නවතාලනවා. සෙවුම් යන්ත්‍රයෙන් Windows Process Explorer යන වදන යොදා සෙවීමක් කළොත් browser එකේ මාතෘකා තීරුවට ඒ වදන් එක් වන නිසා වයිරසය ඒක තේරුම් ගන්නෙ අපි Task Manager ක්‍රියාත්මක කළා වගේ. ඒ නිසා තමයි browser එක වැසී යන්නේ.
---
අදහසක් පහළ වුණා. C:\Documents and Settings\Username\Start Menu\Programs\Accessories වෙත ගිහින් Command Prompt අයිකනයේ නම වෙනස් කළා (මගේ නම දාගත්තා). දැන් ඒක දෙක්ලික් කළාම මාතෘකා තීරුවේ පෙන්වන්නේ මගේ නම (Command Prompt කියා නොවෙයි). ඉතින් වයිරසයට ඒක දැනෙන්නෙ නැහැ (මගේ නම දන්නෙ නැහැනෙ :D ). Command Prompt එකට දුන්නා TASKLIST කියන විධානය. අන්න වයිරසය හදපු කෙනාට වැරදුණු තැනක්! එයාට TASKLIST අමතක වෙලා. මාතෘකා තීරුවේ TASKLIST කියා තිබුණත් Command Prompt වැසී යන්නෙ නැහැ. එළම කිරි!!!

ආපු processes ලැයිස්තුව මම පිටපත් කරගත්තා. මෙන්න ඒ අතරින් අවධානයට ලක් වූ ඒවා කීපයක්.

Image NamePIDSession NameSession#Mem Usage
Japan_Beautiful_Sexy_Girl1864Console02,844 K
Japan_Beautiful_Sexy_Girl3688Console03,056 K
b4029.exe3604Console03,240 K
Japan_Beautiful_Sexy_Girl2784Console03,180 K

බලන්න මේ හතරෙම විශේෂත්වය මතක භාවිතය ආසන්නව සමාන වීමයි. ආසන්න වශයෙන් 3000 K. ඒක මේ හතරම එකම ගොනුවෙ පිටපත් කියල පෙන්නන තව එක සාධකයක් විතරයි.

TASKKILL.EXE මගින් මේ හතරම නවතා දැමුවත් වැඩේ හරිගියේ නැහැ. බරපතල ලෙස ඔඩු දුවලා වගේ. කොහොම වුණත් මට මේකත් එක්ක සෙල්ලම් කරන්න වෙලාවක් ලැබු‍ණෙ නැහැ.
===
ඊයෙ උදෑසන තවත් කෙනෙකුගෙ flash drive එකක මෙය මම අහම්බෙන් දැක්ක.

ඇත්තටම මේ Beautiful Sexy Girl කවුද?


පේනව නේද? රාගයෙහි ඇළුණු සිත් ඇති බාලයෝ වැඩි දුර නොසිතා අමාරුවේ වැටෙති. දැනට Kaspersky හා avast! මෙයාව සාර්ථකව හඳුනාගන්නවා. AVG නම් හඳුනාගන්නෙ නැහැ. අනෙක් වයිරස නාශක ගැන මම දන්නෙ නැහැ. කොහොම වුණත් ප්‍රවේශම් වීම සියල්ලටම වඩා හොඳයි.

ඔන්න ඔහොමයි අද සටහන. අරමුණ ඉටු වුණාද නැත්තම් විකාරයක් වුණාද මන්දා...

෴සමීර ශාකුන්තල | Sameera Shaakunthala෴

Monday, December 15, 2008

තවත් එක් අමානුෂික සිද්ධියක්

අද උදේම හා හාපුරා කියල මට ලැබුණු ඊ මේල් පණිවුඩයත් එක්ක අමුණල තිබුණු වීඩියෝ දර්ශනය නැරඹීමෙන් මගේ හිතේ ඇති වුණ හැඟීම් තවමත් එකිනෙක ගළපා කියන්න බැරි තරම් ව්‍යාකූලයි. ඒ නිසා ඒ ගැන නොලියා ඊ මේල් පණිවුඩය එහෙමම දාන්නම්.
This is terrible. All this has happened while the Indian Police watching. How can they become a super power. India, though brag about ancient civilization, still live in dark, primitive ages. Send this to all you know.

A BIT OF A TAMIL HUMANITY
Dear friends

This is a scene from a recent incident took place in Chennai Law College.

I asked a Tamil friend of mine, who work here as a process engineer, who is also from Chennai, to tell me what the hell is this all about.

Then he told me this is always happening in South Indian Law colleges mainly due to CAST issues and this too..

So these are the people who protest against Sri Lankan Govt.., about so called inhuman acts – stupid idiots.

This incident had taken place in front of Chennai High Court and next to Bar Association head office.

Sri lanka is much, much more civilized than this. Please make your colleagues aware of what's happening in other parts of world, since every body is pointing finger towards our mother land Sri Lanka.
---
ඇති වුණේ පුදුම පිළිකුළක්.. ඉන්දියාවෙ උසස් යැයි කියා ගන්නා කුල වල එවුන් ගැන මහා පිළිකුළක් ඇති වුණා.

මෙහෙමත් හිතුණා:
ඉන්දියාවෙ නපුංසකයොත් පොලිස් නිළධාරීන් ලෙස බඳවගන්නවද?

කරුණාකර, පහසුවෙන් කම්පනයට පත් විය හැකි පුද්ගලයන් පහත දැක්වෙන වීඩියෝ දර්ශනය නැරඹීමෙන් වලකින්න.



---
අවසානයේ මෙහෙමත් හිතුණා:
කාගේ කාගේ හෝ වරදින් අවාසනාවට අපේ රටේ සමහර විශ්වවිද්‍යාල වලත් තත්වය මෙයම නේද? (අපේ ඇහේ තියෙන පොල් පරාලය)

අහෝ මනුලොව මනුෂ්‍යත්වය!!!

මෙන්න මේ වීඩියෝ එකත් බලන්න. මෙය කවුරුත් නැරඹිය යුතුම එකක් කියලයි මට හිතෙන්නෙ.


෴සමීර ශාකුන්තල | Sameera Shaakunthala෴

Saturday, December 13, 2008

පරණ assignment එක සහ තවත් එක් network කතාවක්

කැම්පස් එකේ පළමු වසර දෙවන සෙමෙස්ටරයේ අපට ලැබුණු එක පැවරුමක් (assignment) වුණේ ලිනක්ස් මෙහෙයුම් පද්ධතියක් මත HTTP version 1.0 අනුව ක්‍රියාත්මක වන වෙබ් සර්වර් එකක් නිර්මාණය කිරීම. මම සෑහෙන උනන්දුවකින් කළ assignment එකක් මේක (අළුත් අවුරුද්දෙ නොනගතය වෙලාවෙත් වැඩ). ආදර්ශණය සඳහා HTML පිටු කීපයකුත් නිමැවුණා. මේක මහා ලොකු වැඩක් නෙ‍වෙයි. බබා සර්වර් එකක්. ගිනි හිවල ඉල්ලුවම දෙන්න විතරයි තිබුණෙ. :D
මේක මට වැදගත් වෙන්නෙ මම මෙයින් ලද දැනුම් සම්භාරය නිසා. Assignment එක භාරදීල සති ගණනක් ගිහිල්ලත් මට පරිගණකය ඉදිරිපිටට වෙලා කේත ලියන එක නතර කරගන්න බැරි වුණා. Server Sockets වලින් කරන මේ සෙල්ලමට එතරම්ම මගේ හිත ඇදී ගියා. අන්තිමේ ඒ දැනුම පාවිච්චි කරල සරල (බබා) chat server එකක් සහ proxy server එකක් නිර්මාණය කළා. ලොකු ලොකු වැඩ වලට බහින්න බැරි වුණේ කැම්පස් එකේ NAT (Network Address Translation) අක්‍රිය කර තිබීම නිසයි. පසුව තව තව assignments සෙට් වුණු නිසා වැඩේ අල්ලල දැම්ම. අනිත් දේවලුත් ඉගෙනගන්න එපැයි. ;)
---
අද නිකමට පරණ assignment එකෙන් සෙල්ලම් කර කර ඉඳිද්දි තමයි දැක්කෙ telnet එකෙන් පොඩි සෙල්ලමක් දාපු ගමන් බබා ඩවුන් කියල. කමක් නෑ දැන් බාර දීල ඉවරයිනෙ. මොනව කරන්නද? අනෙක error handling අවශ්‍ය නෑ කියල තිබුණ.. ඒ නිසා බයක් නෑ.. :)

Browser has made a connection to the server.
Browser requests: nawathiyan yako!!!!!!!!!!!!
Error: String index out of range: -1

ඔන්න බබා මළා!



හරි.. ජාලය සම්බන්ධ තාක්ෂණික කතාව මේකයි.
Dialog HSDPA අන්තර්ජාල සම්බන්ධතාවයෙ කෙරෙන්නෙ ග්‍රාහකයන්ට NAT සක්‍රීය කළ dynamic IP ලිපින ලබා දීම. ඒ කියන්නෙ මම දැන් විසන්ධි කරල ආයෙම සම්බන්ධ වුණොත් මට ලැබෙන්නෙ වෙන IP එකක්. (කොහොම වුණත් Dialog එපා වෙන්නෙ Rapidshare වලින් මොනවහරි බාගන්න ගියාම තමයි. :( )
මේ ක්‍රමය නිසා (සියළුම) Dialog HSDPA ග්‍රාහකයින් ඉන්නෙ එකම subnet එකක. මම බබා සර්වර් එක ක්‍රියාත්මක කරල Dialog HSDPA පාවිච්චි කරන යාළුවෙකුට Gtalk හරහා මගේ IP ලිපිනය දුන්න.. මේ වගේ. http://***.***.***.***:3001/
"ඒක වැඩ කරනව මචෝ" එහා පැත්තෙන් reply එක ආවා. මේ server එක local loopback එකෙනුත් ගෙදර අනෙක් පරිගණකය මගිනුත් පරීක්ෂා කර තිබුණත් මේක ඊට වඩා ආතල් වගේ.

ඊලඟට කළ වැඩේ මේකයි.
මම එවෙලෙ වැඩ කරමින් උන්නෙ Windows වල. මම හවුල් බහාලුමක් (Shared Folder) හදල යාළුවට කිව්ව Windows Explorer හරහා \\***.***.***.***\Shared\ යන්න පුළුවන්ද බලන්න කියල. වැඩේ හරි. මිත්‍රයා මට ඒ ටිකට මට MP3 එකකුත් එවල. නමුත් upload වේගය ගොඩක් අඩුයිලු. (ඒකනෙ HSPA කියන්නෙ නැතුව HSDPA කියන්නෙ :D )
මට එවෙලෙ හිතුණෙ මේක මාරයි කියල. මොකද අපි කරන කණ්ඩායම් ව්‍යාපෘති වල අදාළ ගොනු වැඩ කරන වෙලාවෙම share කරගන්න පුළුවන් කියලයි මට හිතුණෙ. Username එකකුයි password එකකුයි දුන්නම ඒක දන්න අයට විතරයි ප්‍රවේශ වෙන්න පුළුවන්.
ඔහොම ටිකක් වෙලා ආතල් එකේ ඉන්නකොට avast කියාපි අර shared folder එකේ virus එකක් තියෙනව කියල. දැන් තමයි දෙලෝ රත් වුණේ. ඒක ඩිලීට් කරගමන්ම දෙවෙනි එක හම්බ වුණා C:\Users\All Users\Documents\ ඩිරෙක්ටරිය ඇතුලෙ තිබිල.. අජීර්ණයක් වගේ..
මම වහාම ක්‍රියාත්මක වන පරිදි shared folder එක ඉවත් කළා.. (අනෙක් ඩිරෙක්ටරියත් shared වුණාට ඉවත් කළේ නැහැ) යන්තම් ඇති. Virus මම පරිගණක නොදන්න කාලෙ මට හොඳ ආතල් දීල තියෙනව. දැන් නම් virus එකක් ආවොත් අයින් කරගන්න එක ගේමක් නෙවෙයි. ඒත් ඒව කරන්න ගියොත් අපේ project කරගන්න වෙලාවක් නැති වෙනවා.

13-Dec-2008 9:19 PM Shaakunthala 1960 Sign of "Win32:Trojan-gen {Other}" has been found in "D:\Entertainment\Shared\ltsnpb.exe" file.
13-Dec-2008 9:20 PM Shaakunthala 1960 Sign of "Win32:Trojan-gen {Other}" has been found in "C:\Users\All Users\Documents\ltsnpb.exe" file.

ඔන්න ඔහොමයි අද ගත්ත ආතල් එක. අත්දැකීම් ටිකක් විතර එකතු වුණා. ඒක වටිනවා. පිටු 1000 ක් 2000 ක් තියෙන පොත් ගිරව දානවට වඩා මේ ලබන අත්දැකීම් පොඩි වුණත් වටිනව කියලයි මට හිතෙන්නෙ.

෴සමීර ශාකුන්තල | Sameera Shaakunthala෴

Saturday, December 6, 2008

asapuva.com හි වංචාකාරී අඩවියක්?

කලකට පෙර මම නිතර යන එන වෙබ් අඩවියක් වෙලා තිබුණා අසපුව.com. මගේ bookmarks එකතුව නිකමට බලද්දි මට හිතුණ ආපහු අසපුව පැත්තෙ යන්න. මම කලින් ඔය අසපුවෙ ගිහිපු පැත්තක් තමයි Dreams of Tarzan අර මෝඩජෝක් සිංදු තියෙන පැත්ත. නිකමට ගියා බලන්න තාම තියෙනවද නැද්ද කියල බලන්න. ඉස්සර ඔතනට ගිහින් මම සිංදුවක් දෙකක් බාගෙනත් තියෙනව. මෙන්න අද යන්න හදනකොට ගිනි නරිය මෙන්න මෙහෙම කියාපි,
වාර්තාවූ ආක්‍රමණික අඩවියකි!

www.asapuva.com හි ඇති මෙම හි වෙබ් අඩවිය ආක්‍රමණික අඩවියක් ලෙස වාර්තා වී ඇති අතර ඔබගේ ආරක්‍ෂක අභිප්‍රේත අනුව අවහිර කර ඇත.

පෞද්ගලික තොරතුරු ‍සොරකම් කිරීම, වෙනත් අයට භාදා කිරීමට ඔබගේ පරිගණකය භාවිතා කිරීමට හෝ ඔබගේ පද්ධතියට හානි කිරීමට හෝ ක්‍රමලේඛන ස්ථාපනය කිරීමට ආක්‍රමණික අඩවි උත්සාහ කරයි.

සමහරක් අක්‍රමණික අඩවිය ඔනැකමින්ම හානිකර මෘදුකංග බෙදාහරින අතර, හිමිකරුගේ අණු දැණුමකින් හෝ අවසරයකින් තොරව සිදුකරයි.

නමුත් පසුගිය මාස තුනක කාලය ඇතුළත සැකසහිත හැසිරීම් එකයිලු වාර්තා වෙලා තියෙන්නෙ. පරීක්ෂා කරපු පිටු 22කින් 13ක්ම පරිශීලකට හොරෙන් malware ඩවුන්ලෝඩ් කරනව කියලත් ගූග්ල් කියනව. වැඩි විස්තර මෙතනින්ම බලාගන්න.







මේව සයිබර් අවකාශයේ සාමාන්‍ය දේවල් බව ඇත්ත. ඒත් ඉතින් දැන් සිංහල අඩවි වලත් තත්වය මේකද?

෴සමීර ශාකුන්තල | Sameera Shaakunthala෴

Thursday, December 4, 2008

Ubuntu නික්ම යාම!

මම Fedora එක්ක දවසක් හමාරක් විතර ඔට්ටු වුණා. මේකෙ ඉගෙනගන්න දේවල් සෑහෙන්න තියෙනවා. සමහර දේවල් අතින් Fedora, Ubuntu වලට වඩා ඉදිරියෙන්. Firewall එකක් මානකරණය කරන නියම අත්දැකීමක් ගත්තේ Fedora වලින්. Windows වලින් Ubuntu වලට මාරු වෙනවට වඩා ලේසියි Ubuntu වලින් Fedora වලට මාරු වෙන එක.
මට ලැබුණු Fedora DVD එකේ ඕන කරන සියළුම දේ තියෙනවා. සිංහල භාෂාව, Apache HTTP Server, PHP, MySQL Server, Mozilla Firefox සිංහල සංස්කරණය, Eclipse, Wireshark, K3b මේ අතරින් කීපයක්. ඉතින් තව Ubuntu මොකටද? ඊයෙ රෑ සිට Fedora/ Windows dual boot!
මම ලිනක්ස් ඉගෙනගන්න පටන් ගත්තේ Ubuntu වලින්. Windows වලට හුරු වෙලා හිටපු මම Ubuntu තරම් පහසු මෙහෙයුම් පද්ධතියක් නොතිබුණානම් කවදාවත් ලිනක්ස් ඉගෙන නොගන්න තිබුණා. පරිගණක ඉගෙනගැනීම මූලික අවශ්‍යතාව නොවන, දිනපතා කාර්යාලයීයය වැඩ කරගන්නත් අන්තර්ජාලය සැරිසරන්නත් මෙහෙයුම් පද්ධතියක් අවශ්‍ය කෙනෙකුට මම තවමත් හොඳයි කියන්නෙ Ubuntu. Ubuntu යන්නේ Windows එක්ක තරඟයක්. ඒ නිසා බොහෝ දේ ස්වයංකරණය (automate - වචනේ හරිද දන්නෑ) කරල තියෙනවා. ඒ අතින් Ubuntu සුපිරි තත්වයේ තිබුණත්, ගැඹුරට දෙයක් ඉගෙනගන්න කැමති කෙනෙකුට Ubuntu මදි.



Ubuntu වලින් යන ගමන් දෙයක් දීල යන්නම්. Ubuntu වලටත් අළුත් අයට Windows XP Theme එකක්. මේක Ubuntu විතරක් නෙවෙයි. Gnome පාවිච්චි කරන ඕනම එකකට පුළුවන්. හැබැයි මේව පාවිච්චි නොකරන තරමට හොඳයි.



---

දැන් ඉතින්... Fedora තමයි.








විශේෂයෙන් ස්තුති කළ යුතු ලිපි පෙළක් ෆෙඩෝරා ලිනක්ස් සටහන්. එයින් බෙහෝ දේ ඉගෙන ගත්තා. අද සිට ෆෙඩෝරා ගමනේ යා!

෴සමීර ශාකුන්තල | Sameera Shaakunthala෴

Tuesday, December 2, 2008

මගේ පරිගණක ඉතිහාසය හා පළමු Fedora අත්දැකීම

ම‍ට මේ ළඟදි ඩනිෂ්ක අයියගෙන් Fedora තැටියක් ලැබුණා. එකක් නෙවෙයි දෙකක්... පහුගිය සිකුරාදා CD එකක් හම්බ වුණා... අද දුන්නා DVD එකක්. මේ සූදානම Fedora ස්ථාපනය කරන්න.
---
මට ඔය අතරෙ හිතුණ මගේ පරිගණක පාවිච්චියෙ අතීතය ගැන මතක සටහනක් ලියන්න. මේක ටිකක් අමුතු පාවිච්චියක්. මොකද මේ ලැයිස්තුවෙ මුලින් තියෙන ඒව ආදි කාලෙ පරිගණක. මම පරිගණක ඉගෙනගත්තෙ ස්වොත්සාහයෙන් -- කවුරුවත් උගන්නලවත්, ඉගෙනගන්න බල කරලවත් නෙවෙයි. ඒ දවස්වල මගේ දැනුම අල්පයි වගේම උනන්දුව තිබුණෙ ක්‍රමලේඛණය ඉගෙනගන්න. ඒ නිසා මේව කියවල කවුරුත් මට හිනාවෙන්න එපා. ම්.. ම්.. ම්... මේ කතාව පටන් ගන්නෙ 2002 අවුරුද්දෙන්. මම සාමාන්‍ය පෙළට සූදානම් වෙන කාලෙ.

මුලින්ම මගේ ඥාතියෙක් පාවිච්චි කරපු Casio fx-5200-p වර්ගයේ එකක්. මේක ගොඩක් වෙලාවට කැල්කියුලේටරයක් වගේ. නමුත් නිෂ්පාදකයා දීපු අත්පොතේ තිබුණෙ Computer කියල. BASIC ක්‍රමලේඛණ භාෂාව භාවිතයෙන් ක්‍රමලේඛණය කරල පාවිච්චි කරන්නයි තිබුණෙ. මේකෙන් මම BASIC ක්‍රමලේඛණ භාෂාව ඉගෙනගත්තා. දැන් නම් BASIC භාවිත වෙන්නෙ නෑ. නමුත් ක්‍රමලේඛණය ඉගෙනගන්න පටන්ගන්න කෙනෙකුට BASIC ඉතාම හොඳයි. (ඒකනෙ Beginer's All purpose Symolic Instruction Code කියන්නෙ). පස්සෙ මම ඒක 'මස්' කරා.

2002 අන්තිමේ මට ලැබුණ තවත් කෞතුක වස්තුවක්. ඒක Atari 800 XL එකක්. ඒකත් පාවිච්චි කරන්න තිබුණෙ තමන් විසින්ම ක්‍රමලේඛණය කරගෙන. ක්‍රමලේඛණ භාෂාව වුණේ Atari Basic (BASIC වලම ව්‍යුත්පන්න ආකාරයක්). පෙනුමින් යතුරුලියනයක් වගේ. මොනිටරය වෙනුවට පාවිච්චි කරන්න තිබුණෙ ගෙදර රූපවාහිනිය :D. ඒකෙ තිබුණා ලොකු RAM එකක්, කිලෝබයිට් 64ක :D. අවශ්‍ය නම් කලින් සකස් කළ ක්‍රමලේඛ වැඩසටහන් අඩංගු කාට්රිජ් පාවිච්චි කර වැඩ ගන්නත් මෙහි පහසුකම් සලසා තිබුණා. මට මතකයි ඒත් එක්ක තිබුණා Microsoft Basic II කාට්රිජ් එකකුත්. මේකෙන් මට වැඩිය වැඩ ගන්න වුණේ නෑ සාමාන්‍ය පෙළ නිසා. මම ඒකත් මස් කළා. කුතුහලය තමයි මේ ඉලෙක්ට්‍රොනික මස්කඩ දැමීමට හේතුව.

මගේ පරිගණක පිස්සුව දැකල තාත්ත මට 2003 අප්‍රේල් මාසෙ පරිගණකයක් ගෙනත් දුන්න. ඒකෙ මෙන්න මේ දේවල් තිබුණ.
  • RAM - 128 MB SDRAM
  • VGA - 16 MB Shared
  • HDD - 20 GB IDE
  • CPU - 1.3 GHz AMD Duron
  • 52x CD-ROM Drive
  • Windows 98 OS
මේකෙන් ගොඩක් දේ ඉගෙනගත්ත. සැරින් සැරේ මස්කඩත් දැම්ම. මම කිසි කෙනෙක්ගෙන් උපදෙසක්වත් ගන්නෙ නැතුව තනියම පොතපත හොයාගෙන කියවල BIOS update, CPU overclocking වගේ 'ලොකු' දේවලුත් ප්‍රායෝගිකව කරල ඉගෙනගත්තා. පසුව Windows XP වලට මාරු වුණා. Windows XP hacks පවා තනියම හොයාගෙන අත්හදා බැලුවා. ඔය අතරෙ මට මිත්‍රයෙකුගෙන් ලැබුණ Ubuntu 5.10ත් පාවිච්චි කරන්න පටන් ගත්තා. Linux වලට මාරු වෙන්න පටන් ගත්තෙ ඒ කාලෙමයි. මොකද ඒ කාලෙම අවබෝධ කරගෙන තිබුණා Windows වල යම් යම් දේ restrict කරල තිබුණු බවත් 'ලොකු' දේවල් ඉගෙනගන්න නම් Linux වලට යා යුතු බවත්. නමුත් ලොකු ගැටළුව වුණේ සිංදු අහන එක :D. ඒ නිසා Ubuntu/ Windows dual boot.

කාලෙන් කාලෙට ඒක upgrade කරල දැන් තියෙන්නෙ මෙහෙම. හැබැයි දැන් පාවිච්චි කරන්නෙ මම නෙවෙයි.
  • RAM - 256 MB DDR1
  • VGA - 16 MB Shared
  • HDD - 80 GB SATA, 40 GB IDE
  • CPU - Intel Celeron 2.53 GHz
  • 52x CD-ROM Drive
  • CD-RW Drive
  • TV Card
  • SLG Ubuntu/ Windows XP Dual Boot

2007 දෙසැම්බර් වල මම ගත්ත Acer Aspire 4315 ලැප්ටොප් එකක්. ඒක තමයි දැනටත් පාවිච්චි කරන්නෙ. නිෂ්පාදකයා එවන්නෙ Linpus Linux දාල. ඒ වුණාට මෙහෙදි විකුණන්න කලින් දානව Windows XP ව්‍යාජ පිටපතක් :D. මම Windows Vista දමාගෙන බැලුව හිතට හරි නෑ.. ඒ නිසා ආයෙම Windows XP වලට මාරු වුණා. ඒ ගමන් දැම්ම Ubuntu. දැන් මෙහෙමයි.
  • RAM - 512 MB DDR2
  • CPU - Intel Celeron 1.73 GHz
  • HDD - 120 GB SATA
  • DVD-RW Drive (Dual Layer)
  • Windows XP/ Ubuntu 8.10 Dual Boot

ඒ තමයි මගේ පරිගණක ඉතිහාසය. මේ මැෂිම මං දැන් අවුරුද්දක් පුරාවට පාවිච්චි කරනව. මම ලොකු ශක්‍යතාවක් තියෙන, posh රැස් විහිදෙන පරිගණක වලට නොයන්න හේතුව මගේ මූලික අවශ්‍යතාවය වන ක්‍රමලේඛණය ඉගෙනීමට පොඩි පරිගණකයක් ප්‍රමාණවත් වීම. මම VirtualBox පාවිච්චි කරන නිසා ළඟදි RAM එක විතරක් upgrade කරන්න අදහසක් තියෙනව. ඊට පස්සෙ Windows/ Linux dual boot නෑ. :)
---
දැන් එමුකො Fedora කතාවට,
පහුගිය සිකුරාදා ඩනිෂ්ක අයිය දීපු අළුත් Fedora CD එක දාල පැය ගාණක් කට්ට කෑව Fedora දාගන්න. එතකොට තමයි දන්නෙ මගේ DVD Writer එක අවුල් කියල. මැෂිම Metropoliton ගෙනියන්න වෙයි වගේ.. warranty එකෙන් මොකක් හරි කරගන්න. කොහොම හරි අමාරුවෙන් Fedora boot කරගත්තා. මෙන්න ස්ථාපනය කරන්න යනකොට කියාපි input/output error කියල. ඔන්න ඔහොමයි පළමු Fedora අත්දැකීම.



දැන් මොකෝ කොරන්නෙ... අද ඉල්ලගත්ත DVD එකක්. දැන් ඒක දාල බලන්නයි සූදානම. ටික දවසක් Fedora වලට හුරු වෙනකම් Windows/ Ubuntu / Fedora තුනම පාවිච්චි කරනවා. මේ තියෙන්නෙ ඒ ගැන ලිව්ව (ටිකක් තාක්ෂණික) සටහන. ඊට පස්සෙ Fedora/ Windows තමා. RAM එක ගත්තට පස්සෙ Windows on Fedora වෙයි. :)

Fedora මේ දැන් install කරනු ලැබේ...!

෴සමීර ශාකුන්තල | Sameera Shaakunthala෴

Sunday, November 30, 2008

Prabakaran's Desktop

මේක මට ආපු E-mail එකක්. මෙහි නිර්මාණකරු කවුද කියා නම් දන්නෙ නෑ.

ඨොඩය් ඓ'ම් ට්ය්පින්ග් තිස් උසින්ග් තෙ ර්‍ඒල්ටිමෙ Cඔන්වෙර්ටෙර්. ඇ ස්මල්ල් ටෙච්නිcඅල් ප්‍රොබ්ලෙම් විත් Sඉන්හල Uනිcඔඩෙ. :(
Today I'm typing this using the Realtime Converter. A small technical problem with Sinhala Unicode. :(



Sameera Shaakunthala

Saturday, November 29, 2008

SLGUbuntu from UCSC

UCSC හා Dialog Telekom එක්ව සංවිධානය කළ Sri Lanka Genius 2008 වැඩසටහනේ රූපවාහිනී තරඟ වට මේ දවස් වල සෙනසුරාදා රාත්‍රී 7.00 ට ජාතික රූපවාහිනියෙ විකාශය වෙනව. SLGenius වැඩසටහන කරන්න කැම්පස් එකේ ජ්‍යෙෂ්ඨ බැච් එකේ අයියලා අක්කලාත් අපේ බැච් එකේ අයත් සෑහෙන මහන්සි වුණා. වැඩියෙන් මහන්සි වුණේ මේක සංවිධානය කරපු අපේ අයියලා අක්කලා.

පරිගණක තාක්ෂණයේ බොහෝ දෙනා නොදුටු පැත්තක් වන නිදහස් හා විවෘත මෘදුකාංග ගැන පාසල් ශිෂ්‍යයින්ව දැනුවත් කිරීමත් මේ SLGenius වලින් සිදුකෙරුණා. මෙහිදී පාසල් සිසුන්ට නොමිලේ Linux සංයුක්ත තැටි බෙදා දුන්නා. මේ සඳහා යොදා ගත්තේ Ubuntu මෙහෙයුම් පද්ධතිය සංස්කරණය කර නිපදවන ලද SLGUbuntu මෙහෙයුම් පද්ධතිය.



Ubuntu සමග multimedia codecs ලැබෙන්නෙ නෑ. නමුත් SLGUbuntu සංයුක්ත තැටියේ අවශ්‍ය සියළුම multimedia codecs අඩංගුයි. Linux ඉගෙනීම ආරම්භ කරන කෙනෙකුට හොඳම මෙහෙයුම් පද්ධතිය Ubuntu. නමුත් ගැටළුවක්ව පැවතුණේ ශ්‍රව්‍ය-දෘශ්‍ය මාධ්‍ය භාවිත කි‍රීමේ අපහසුව නිසා බොහෝ දෙනා Ubuntu පාවිච්චි නොකර සිටීමයි. SLGUbuntu මේ අවශ්‍යතාව සපුරා තිබෙනවා.

SLGUbuntu මුල්වරට නිපදවූයේ Ubuntu 7.10 ඇසුරින්. Ubuntu 7.10 සමග නොලැබුණු සිංහල භාෂාව, wine, Beryl හා Compiz Fusionද මෙයට එක් කර තිබුණා. නමුත් ලිනක්ස් කර්නලයේ සැලකිය යුතු වෙනසක් කර නැහැ.



SLGUbuntu හැදුවේ කැම්පස් එකේ අපට ජ්‍යෙෂ්ඨ බැච් එකේ සුපුන් අයියා. ඔහු මේ වෙනුවෙන් ගොඩක් මහන්සි වුණා. Ubuntu ස්ථාපනය කළාට පසුව මේ වෙනස් කිරීම් කරන එක පහසු කාර්යයක් වුණත්, නැවත බෙදාහැරීම සඳහා මේ ආකාරයට එය සකස් කිරීම තරමක් අසීරු කාර්යයක්.

බලන්න ලිනක්ස් වල නිදහස. අපට ඕන විධියට වෙනස් කලා... බෙදාහැරියා...

෴සමීර ශාකුන්තල | Sameera Shaakunthala෴

Friday, November 28, 2008

The first Porn Shop - ශ්‍රී ලංකාද්වීපයේ ප්‍රථම වතාවට

මේ බ්ලොග් සටහන බලද්දි මට මේක මතක් වුණේ. දැන් ටිකක් පරණයි මේක. :D



---

මම කාගෙවත් නොදන්න කමට හිනා වෙනව නෙවෙයි. සිංහල කියල මේ තරම් ලස්සන භාෂාවක් තියෙද්දි ඇයි අපි ඉංග්‍රීසි නම් දාගෙන වරිගෙ නහගන්නෙ?

෴සමීර ශාකුන්තල | Sameera Shaakunthala෴

Monday, November 24, 2008

මගේ Assignment කෙරුවාව

අද in-class assignment එකක්. සිරිත් පරිදිම අවසන් මොහොත වෙනකම් මොනවත් බලාගත්තෙත් නෑ. කුප්පියක් දම්මගන්න අදහසකුත් නෑ... උදේ පාන්දරම ආතල් එකේ මල් පාත්තියක් දාගෙන හිටිය.

Assignment එක පටන්ගත්තාම තමයි දෙයියො සිහි වුණේ. පේපර් එකේ තිබුණ මෙලෝ හසරක් හිතාගන්න බෑ. කරකවල අතෑරිය වගේ. දීල තිබුණ කාලය පැය එකහමාරක් වගේ මතකයි. මුල් පැය කාලක් බාගයක් විතර හොඳට නිදා ගත්තා (අර බෝංචි මාමා නිදාගත්තා වගේ). ඇහැරුණාට පස්සෙ පටන් ගත්ත උත්තර ලියන්න.

පාඩම් කරල නැති වුණත් මේවට උත්තර ලියන්න ක්‍රම තියෙනව. ප්‍රශ්න ඇතුලෙම උත්තරය හැංගිලා තියෙනව. ඔහොම හිතාගෙන කොහොම හරි වෙට්ටු දාල මොන මොනව හරි බොරු ටිකක් ලිව්ව. තව තැනින් තැනින් කාන්තාර වගේ හිස් තිබ්බ. ලියල එළියට ආවට පස්සෙ මාර සැහැල්ලුවක් දැනෙන්නෙ.
---
හෙටත් තියෙනව එකක්. Business Statistics and Operational Research. ඇත්තටම මොන එකකට මේව තියෙනවද මන්ද.. business කියනකොටත් මට තිත්තයි... අප්පිරියයි...
ඒකට නම් කුප්පියක් දා නොගත්තොත් සදා අනාතයි. :(

෴සමීර ශාකුන්තල | Sameera Shaakunthala෴

Sunday, November 23, 2008

Wordpress ආරක්ෂිතද?

මිනි බ්ලොග් මැරතන් ගැන ගොඩක් අය කතා වෙනව. මටත් ආස හිතුණ මොනව හරි බයිල ටිකක් පැය කාලෙන් කාලට ලියල දාන්න. ඒත් තාම හරි අයිඩියාවක් නෑ. :( කැම්පස් එකේ assignment එකක් සෙට් වුණොත් නම් ඉතින් අනිවා එන්නෙ නෑ. කෝකටත් සහ වෙනසකට කියල මම Wordpress එකේ බ්ලොග් එකක් පටන් ගත්ත. ඒක http://shaakunthala.wordpress.com
---
මේ කියන්න යන්නෙ Wordpress account එකක් හදද්දි වෙච්ච දෙයක්. Wordpress account එක හදන්නෙ මෙහෙමයි. Wordpress.com අඩවියට තමන්ගෙ විද්‍යුත් තැපැල් ලිපිනය, අළුත් පරිශීලක නම හා මුරපදය ලබා දුන්නම ඔවුන් conformation විද්‍යුත් ලිපියක් එවනව. Wordpress ඉතිං පොල් ගෙඩි අකුරු වලින්නෙ වැඩ. අර විද්‍යුත් ලිපියෙ තියෙන conformation link එක ක්ලික් කළාම යනව ආයෙම Wordpress අඩවියට. මෙන්න මගේ password එක පොල්ගෙඩි සයිස් අකුරෙන් screen එක මැද!!!

මෙතන ගැටළු දෙකක් තියෙනවා.
  1. ළඟපාත කවුරුත් හිටියනම් මගේ password එක දකිනව.. පැහැදිලිව.


  2. මේක ටිකක් තාක්ෂණික කරුණක්. මං වැරදි නම් කවුරුහරි මාව නිවැරදි කරන්න. සාමාන්‍යයෙන් යම් අඩවියකට මුරපදයක් ලබා දුන්නම ඔවුන් එය ගබඩා කරගන්නෙ එය encrypt කරල. Encrypt කළාම ලැබෙන hash එක තමයි database එකේ ගබඩා වෙන්නෙ. Wordpress හි ලියාපදිංචි වන විට අප ලබා දෙන මුරපදය encrypt වී ඔවුන්ගේ database එකේ ගබඩා වූවා නම් එය අපට නැවත දර්ශනය වීමේ හැකියාවක් නෑ. මොකද hash එකක් නැවත එහි මුල් ස්වරූපය බවට පත් කරන්න නොහැකි නිසා (මම කියන්නෙ MD5 ගැන). ඒ කියන්නෙ මගේ password එක එහි මුල් ස්වරූපයෙන්ම Wordpress දත්තමූල වල ගබඩා වෙනවා!!! එහි ආරක්ෂාව පිළිබඳ අවදානමක් තියෙනව කියලයි මගේ හැඟීම.
තවත් එකක් තියෙනව https නැති එක. ඒක ගොඩක් වෙබ් අඩවි වල නැති නිසා ඒ ගැන එච්චර කියන්නෙ නෑ. https නෑ කියන්නෙ ඉතින් හරි පොරකට අහුවුනොත් සොරි තමා (කැම්පස් එකේ අත්දැකීම් වලින් කියන්නෙ).

---
කොහොම වුණත් මේක මට නම් ඇත්තටම අවුලක් නෑ. :D

෴සමීර ශාකුන්තල | Sameera Shaakunthala෴

Saturday, November 22, 2008

සිත්ගත් ගීතය

මේ මම කැමතිම ගීතය, Strength of a Woman. ඔබවාහිනියෙ සැරිසරදිදි අහම්බෙන් දැක්කෙ. මේ වීඩියෝ එක ජර්මනියේ Night of the Proms ප්‍රසංගයේ දර්ශනයක්. මෙහි විශේෂත්වය තමයි Reggae/ Rock සංගීතය Classic සංගීතයත් සමග මනා ලෙස ගලපා තිබීම. බලන්න කෙතරම් අපූරුද කියා...




෴සමීර ශාකුන්තල | Sameera Shaakunthala෴

Friday, November 21, 2008

නිදහස

නිදහස කියල මාතෘකාව තිබුණට මේ ලියන්නෙ ශාස්ත්‍රීය දෙයක් නෙවෙයි. ආගිය කතාවක්. හදිසියෙම මගේ ජංගම දුරකථනය ක්‍රියාවිරහිත වුණා. දැන් කොහේ ගියත් යන්නෙ හිස් අතින්. එක්කො මේක හදා ගන්න පුළුවන්. අළුත් එකක් ගන්නත් කාලෙ හරි. ඒත් ජංගම දුරකථනය නැති වුණාම මාර නිදහසක් දැනෙන්නෙ.

මිස්කෝල්ස් නෑ.. SMS මළවදේ නෑ.. සාක්කුවට බරත් නෑ.. එකම අවුල තියෙන්නෙ හදිසියකදි ගෙදරට කෝල් එකක් ගන්න එක තමා. මේ කාලෙ හැටියට ජංගම දුරකථනයක් නැතුව දුර ගමන් යන එක ටිකක් භයානක තමයි.

ඒත් මම ටික දවසක් මේ නිදහස අත්විඳිනව.

෴සමීර ශාකුන්තල | Sameera Shaakunthala෴

Monday, November 17, 2008

අළුත් වයිරසයක්ද?

අද උදෑසන දුම්රියේදී මට මගේ මිත්‍රයෙකුගෙන් අසන්නට ලැබුණේ දුක් ගැනවිල්ලකි. ඔහුගේ පරිගණකයේ තිබූ ගීත හා වීඩියෝ ගොනු සියල්ල අස්ථානගතවී ඇති බව ඔහුගේ දුක් ගැනවිල්ල විය. මෙය වයිරසයක්දැයි සැක සිතුණු නිසා මම වැඩිදුර ප්‍රශ්න කිරීම ඇරඹූයෙමි. පසුව දැනගත් පරිදි ජංගම දුරකථනයෙන් ලබාගත් කෙටි පණිවුඩ ගොනු මැකී ගෙස් නැත. තවද පරිගණකය ක්‍රියා විරහිත කරන විට ඉබේ නතර නොවන එක් ක්‍රමලේඛයක් ඇති බවත්, එය අවසන් කිරීමට End Now බොත්තම එබිය යුතු බවත්, කලින් එසේ නොවූ බවත් ඔහු කීය. මගේ සැකය බොහෝ දුරට තහවුරු විය.

උදේ පාන්දර සරසවියේදී බැචියකගෙන්ද මෙවැනිම දුක් ගැනවිල්ලක් ඉදිරිපත් විය. පරිගණකයේ බොහොමයක් අත්‍යවශ්‍ය ගොනු මැකී ඇති බවත්, පරිගණකය ක්‍රියාවිරහිත කිරීමේදී rundll32.exe නතර නොවන බවත් ඈ කීවාය. වයිරස් සැකය මත වයිරස් නාශකයෙන් පරීක්ෂා කළත් ඉන් පලක් නොවූ බව දුක් ගැනවිල්ලේ සඳහන් විය.
---
මගේ සැකය තවත් තහවුරු විය. ඔබ සැමට කිව යුතු පණිවුඩය මෙයයි. අළුත් වයිරසයක් ආ සැනින් වයිරස් නාශක ඒ ගැන දැනුවත් යයි නොසිතන්න. මොන තරම් ප්‍රබල වයිරස් නාශකය වුවත් අළුත්ම වයිරස හමුවේ අසරණ විය හැකිය. ඒ වයිරස් නාශකයේ නිෂ්පාදකයා අළුත් වයිරස පිළිබඳ දත්ත වලින් වයිරස් නාශකය දැනුවත් කරන තුරු (update) වයිරස් නාශකය අළුත් වයිරස නොහැඳිනීමය. මට හැඟෙන පරිදි දැන් rundll32.exe (Run DLL as App) වින්ඩෝස් ක්‍රමලේඛයේ නමින්ම ක්‍රියාත්මක වන අළුත් වයිරසයක් ඇත (මේ සටහනේ svchost.exe මෙන්). ප්‍රවේශම් වන්න. මේවායින් ආරක්ෂා විය යුතු අන්දම ගැන සුළු විස්තරයක් මේ සටහනෙන් කියවන්න.

Start --> Search මගින් rundll32.exe ගෙනුව සොයන්න. C:\WINDOWS\System32 හැර වෙනත් ස්ථානයක එය පිහිටියහොත් එය බොහෝ විට (බොහෝ විට නොව 100% වුවත්) වයිරසයක් විය හැකිය.

දන්නා පරිදි මෙයට තවම බෙහෙත් සොයාගෙන නැත.

෴සමීර ශාකුන්තල෴Sameera Shaakunthala෴

Sunday, November 16, 2008

සිංහරාජෙට ගිය විනෝද ගමන

මට දැන් මීට මාස තුනකට විතර කලින් (එතකොට මම බ්ලොග් ලිවීම අතහැර දාලයි හිටියේ) කැම්පස් එකේ යාළුවො ටිකක් එක්ක සිංහරාජෙට ගිය ආතල් ගමන මතක් වුණා. කෝ දැන් දෙක වසරනෙ. කොළඹින් එළියට ගිහින් ඒ වගේ ආතල් ගන්න ආයෙම නිදහසක් එයිද දන්නෙත් නෑ. ඒ තරමට වැඩ.

මේ වීඩියෝ තුනේ තියෙන්නෙ ඒ සොඳුරු මතකයන්ගෙන් බිඳක්...

මේ අපේ ගමනේ පිංතූර ටිකක්...


ආපහු එන්න බස් නැතුව මල පැනල ඉන්න වෙලාවෙ දුන් පොඩි ආතල් එකක්...


ට්‍රැක්ටරේ ආතල් එක... මෙදේරිපිටියෙන් යන අන්තිම බස් එකත් ගිහිං! කොහොම හරි අමාරුවෙන් තේ දළු ගේන ට්‍රැක්ටරයක් සෙට් කරගත්තා... තේ දළු උඩ වාඩි වෙලා අපි 12ක්.. මාර ආතල්... (බය වෙන්න එපා.. ඒව පිටරට පටවන ඒව :D)


බලමු.. තව මාස දෙකකින් exam ඉවර වුනාම පුළුවන්ද කියල.. තව කොහෙ හරි යන්න....

෴සමීර ශාකුන්තල෴Sameera Shaakunhala෴

Friday, November 14, 2008

ඉබි කෙළිය

ඔන්න මම ආයෙත් පටන් ගත්තා ඉබ්බා ගහන්න.

හවසට බෑග් එකත් එල්ලගෙන කැම්පස් එකේ ඉඳං බම්බලපිටියට පයින් යන්න කම්මැලි හිතුණා. පයින් ගිහින් තව කෝච්චියෙ හිටගෙනත් යන්න වුණාම ඇඟට හරි සැප! ඒ නිසා මං දැන් හවසට බස් එකේ බම්බලපිටියට යනව. කෝ බස් එකේ ටිකට් දෙන්නෑනෙ. මං මොකද කරන්නෙ කොන්දොස්තරත් එක්ක වාද කරන්නෙ නෑ; ගහනව ඉබ්බ. මටත් ලේසියි, ලාබයි. හැබැයි කොන්දොස්තර අතේ ටිකට් පොත තිබුණොත් නම් මම ටිකට් ගන්නවා.

මම මහරගම බෝඩිමේ හිටපු කාලෙ 112, 138, 176.. මේ ගොඩක් ඒවයෙ ටිකට් නොදෙන වෙලාවට මම නොසෑහෙන්න ඉබ්බ ගහල තියෙනව. සමහර දවස් වල යාම් ඊම් දෙකම නොමිලේ.. :D

ඉස්සර එක කාලෙක මේක පුරුද්දක් කරගෙන හිටිය.. ඉඳහිට දවසක අම්බලන්ගොඩ - කොළඹත් නොමිලේ.. සල්ලි නැති කමකට නෙවෙයි, ආතල් එකට. පස්සෙ ඒ වැඩේ වැරදි බව තේරුම් අරං නැවැත්තුවා.

CTB බස් වල නං කොහොම හරි ටිකට් එක ගන්නවා. ඒත් පුද්ගලික බස් වල ඉබි කෙළිය සලකා බලනවා. ටිකට් දෙන්නැත්තං ඉතිං අනිවා ඉබ්බා.

ටිකට් වලට බස් කොන්දොස්තරලත් එක්ක ඇරගන්නෙ මොකටද? මං වගේ ඉබ්බ ගහන්න පුරුදු වෙන්න.

ගැමුණු විජේරත්න මහත්තය දැං කියයිද දන්නෙ නෑ 'ඉබ්බො ගහන්නන්ගේ ප්‍රතිශතය ඉහළ යාම නිසා බස් ගාස්තු තව 25%කින් වැඩි කළ යුතුයි' කියල.

෴සමීර ශාකුන්තල | Sameera Shaakunthala෴

ArgoUML

Rational Rose මෘදුකාංගයට FOSS ආදේශකයක් සොයන්න පටන් අරන් හෙම්බත් වෙලා හිටියෙ. හොඳ වෙලාවට සිලිය එකක් පිටමං කරල. දැන් Ubuntu වල ඉඳගෙනම (Windows වලට මාරු නොවී) design වැඩ කරන්න පුළුවන්. :)

මේක විශේෂිතව ස්ථාපනය කරන්න අවශ්‍ය නෑ. Java වලින් හදල තියෙන්නෙ. පාවිච්චිය හුරු වෙන්න නම් මට ටික දවසක් යයි වගේ. මට නම් හොඳා...

Just type ./argouml.sh and hit Enter. Here you go!!


෴සමීර ශාකුන්තල | Sameera Shaakunthala෴

Thursday, November 13, 2008

නිදහස සොයා - 2 | නිදහස්-විවෘත මෘදුකාංග හා සංවෘත මෘදුකාංග

පෙර ලිපිය හා සබැඳේ.

අද GNU/GPL ගැන ලියන්න බලාපොරොත්තු වෙලා හිටියත් ඒ ගැන තව වැඩිදුර අධ්‍යනයක් කරලා පසුව ලියන්න හිතුණා. මෘදුකාංග බලපත්‍ර ක්‍රම රාශියක් පවතිනවා. සමහර මෘදුකාංග වල මේ බලපත්‍ර දෙකක් සංයෝජනය කර සාදාගන්නා බලපත්‍ර ලබා දෙන ක්‍රමයකුත් තිබෙනවා. තොරතුරු තාක්ෂණයත් නීතියත් එකට සන්ධි වෙන එක් සන්ධිස්ථානයක් තමයි මෙය. ඉතින් මෘදුකාංග බලපත්‍ර ක්‍රම ගැන ලියන්න කලින් තව අධ්‍යනය කරන එක මගේ ඉගෙනීමටත් වැදගත්.

---

අද මම ලියන්නෙ නිදහස් හා විවෘත මෘදුකාංග (කෙටියෙන් FOSS - Free and Open Source Software කියමු) සහ සංවෘත (closed source) මෘදුකාංග අතර පොඩි සංසන්දනයක්.

FOSS වල ඇති විවෘත විනිවිද භාවය නිසා පරිශීලකයාට රිසි පරිදි එහි අභ්‍යන්තරය‍ට එබී බලන්නත් මෘදුකාංගය සංස්කරණය කරන්නත් පුළුවන්. එහි තේරුම තමාගේ මෘදුකාංග පිටපත තමා විසින් අවශ්‍ය පරිදි වෙනස් කරගැනීම පමණක් නොවෙයි, ඉන් ඔබ්බට ගොස් අළුත් යමක් සොයා ගත් විට අනෙක් අය සමග එය බෙදා හදා ගැනීම මගින් ලොවට යමක් දායාද කරන්නත් පුළුවන්. මේ බෙදා හදා ගැනීම් සඳහාම කැප වූ සංසද හා forums සෑහෙන ප්‍රමාණයක් අන්තර්ජාලය හරහා සොයාගන්න පුළුවන්. මේවා බොහොමයකට නොමිලයේම සම්බන්ධ වෙන්න පුළුවන්. ඒ වගේම පූර්ව තාක්ෂණික දැනුමක් තිබීමත් අත්‍යාවශ්‍යම නැහැ.

GNU ව්‍යාපෘතිය ආරම්භ කළ රිචඩ් මැතිව් ස්ටෝල්මන් නැමැත්තා වරෙක මෙසේ කියා තිබෙනවා,

"To serve humanity with software, software should be free, because software belongs to human knowledge. Proprietary software does not belong to human knowledge."

අද වන විට ලබා ගත හැකි FOSS ඇත්ත වශයෙන්ම තනි පුද්ගලයෙකුගේ, සමාගමක හෝ ආයතනයක දැනුමෙන් ගොඩනැගුණු ඒවා නොවෙයි. එය මුළු මහත් මිනිස් වර්ගයාගේම දැනුම නියෝජනය කරනවා.

උදාහරණයක් ලෙස අපි GNU/Linux කර්නලය (මෙහෙයුම් පද්ධතිය) ගනිමු. 1991දී මෙය නිර්මාණය කළේ විශ්වවිද්‍යාල ශිෂ්‍යයෙකු විසින් (Linus Torvalds, undergraduate at University of Helsinky). කාලයත් සමඟ විවිධ රටවල විවිධ පුද්ගලයන්ගේ දැනුමින් පෝෂණය වෙමින් දියුණු වූ මෙය අද පරිගණක භාවිතය ඉගෙනගන්නා අයගේ සිට මහාචාර්යවරුන් දක්වා විවිධ දැනුම්/ බුද්ධි මට්ටම් ඇති බොහෝ පිරිසකගේ එදිනෙදා අවශ්‍යතාවන් සපුරන්නක්. වෙනත් මෙහෙයුම් පද්ධතිද ප්‍රචලිතව තිබූ මේ කාලයේ Linux දියුණුවට ලොකු හේතුවක් වුණේ මූල කේත දෙස ඕනෑම කෙනෙකුට බලන්න පුළුවන් වීම හා නිදහස් බවයි.

සමහරවිට කෙනෙකුට හිතෙන්න පුළුවන් මූලය විවෘත නිසා වයිරස නිර්මාණය කරන අයට මේ මෘදුකාංග වල කේතය අධ්‍යයනය කරල ඒ මෘදුකාගංයට හානි කරන වයිරස නිර්මාණය කරන්න පුළුවන් නේද කියල. ඇත්ත තත්වය එය නොවෙයි. යමක් සංවෘතව ඇති තාක් මිනිස්සු උත්සාහ කරන්නෙ ඒ දේ අභ්‍යන්තරය කොහොම හරි බලාගන්න. ඒ විතරක් නෙවෙයි කොහොම හරි අභ්‍යන්තරයට එබිල අනිත් අයට කරන්න බැරි දෙයක් කරල පෙන්නල 'පොර' වෙන්න. එතැනින් තමයි hackers/ crackers හා වයිරස ලියන්නන්ට මග විවර වෙන්නෙ. නමුත් දෙයක් විවෘත වුණාම, එහි ඇති අරුමයක් නැති බව පෙණුනම මිනිස්සු ඒක තව දියුණු කරල 'පොර' වෙන්න හදනව මිසක් එය විනාශ කරන්න දඟලන්නෙ නෑ. කාගෙත් හොඳ වෙලාවට තවමත් ලෝකයේ තාක්ෂණය දන්න අයගෙන් වැඩි හරියක් යහපත් අය. ඒ නිසා තමයි ලිනක්ස් කර්නලය මෙතරම් දියුණු තත්වයෙන් අද පවතින්නෙ. එයට වයිරස වලින් හානියක් කළත් මූලය විවෘත නිසා ඕනෑම කෙනෙකුට එය ඉක්මනින් යථා තත්වයට ගෙන එන්නත් පිළියම ලොවට ඉදිරිපත් කරන්නත් පුළුවන්. ඒ විතරක් නොවෙයි. තාක්ෂණික දැනුම නැතිනම් හානිය ගැන අනෙක් අයව දැනුවත් කළාම කාට හරි ඉක්මන් පිළියමක් සොයා ගන්න පුළුවන්.

ලිනක්ස් වල ඇති නිදහස් හා විවෘත බව නිසා දැනට ලෝකයේ පාවිච්චි වෙන ලිනක්ස් කර්නල අතර විවිධත්වයක් තිබෙනවා. ඒ බොහෝ අය තමන් ලද දෙය රිසි පරිදි සකස් කරගෙන පාවිච්චි කරන නිසා. මේ විවිධත්වය නිසා එක් ලිනක්ස් කර්නලයකට හානි කිරීමට සමත් වයිරසයක් තවත් ලිනක්ස් කර්නලයක් හමුවේ අසරණ වෙනවා. නමුත් Windows හෝ වෙනත් සංවෘත මෙහෙයුම් පද්ධතියකට හානි කරන්න සමත් වයිරසයක්, ලොව පුරා ඇති එම මෙහෙයුම් පද්ධති කර්නල පිටපත් වල ඇති එකිනෙකට සමාන බව නිසා පහසුවෙන් ජය ගන්නවා. අවශ්‍ය නම් ඕනෑතරම් උදාහරණ දෙන්න පුළුවන්.

---

අපි හිතමු යම් කෙනෙක් FOSS එකක දෝෂයක් (bug) සොයා ගත්ත කියල. අවශ්‍ය තාක්ෂණික දැනුම තියෙනවනම් ඔහුට පුළුවන් ඒ සඳහා 'patch' එකක් තමන් විසින්ම හදල නිකුත් කරන්න. විවෘත නිසා අනෙක් අයට පුළුවන් එහි නිවැරදි බව පරීක්ෂා කරන්න. තාක්ෂණික දැනුම නැතිනම් පුළුවන් bug එක ගැන forum එකක කතා කරන්න. එවිට කාට හරි පුළුවන් patch එක හදන්න. FOSS අභ්‍යන්තරය දෙස මුළු ලොකයේම නෙත් යොමු වී ඇති නිසා ඇති වන දෝෂ ඉක්මනින්ම සොයා ගැනෙනවා.

නමුත් සංවෘත මෘදුකාංග වල දෝෂයක් හොයා ගත්තම එය තමන්ටම නිවැරදි කරන්න බෑ. එහෙම කරන්න පුළුවන් දියුණු තාක්ෂණික ක්‍රම තිබුණත් ඒවා පාවිච්චිය නීති විරෝධීයි. ඒවා පාවිච්චියේදී bugs ගැන අදාළ සමාගමට පැමිණිලි කළ යුතු වෙනවා. ඔවුන් එයට අවශ්‍ය විසඳුම දෙන්නෙ ඔවුන්ට අවශ්‍ය පරිදි අවශ්‍ය නම් පමණයි. විසඳුම් ලැබෙනකොට අශ්වයා පැන ගිහින් ඉවරයි. හොඳම උදාහරණය Windows XP Service Packs නිකුත් වෙන්න කොයි තරම් කාලයක් ගියාද?

---

මේ අතරෙ Microsoft ගැනත් යමක් කියන්න ඕන. බිල් ගේට්ස් පෝල් ඇලන් හා එක්ව හැදූ MS-DOS පද්ධතිය දියුණු වෙලා Windows දක්වා දියුණු වුණේ Microsoft ආයතනයට සේවය කරන අය අතින් පමණයි. ලෝකයේ සෙසු අය කළේ ගුණ දොස් විචාරන එකයි. එහෙනම් කොහොමද Microsoft තවමත් ලෝකයේ අංක එක වෙලා තියෙන්නෙ?

ඒකට හේතුව Microsft සමාගමේ දක්ෂ අලෙවි ප්‍රවර්ධන උපාය ක්‍රම (marketing strategies) හා උසස් මට්ටමක ඇති කළමනාකරණය කියලයි මට හිතෙන්නෙ. ව්‍යාපාරික මට්ටමින් බැලූ විට එය පැසසිය යුතු දෙයක්. (හැබැයි ඔවුන් ව්‍යාපාර කරන්නෙත් නීති විරෝධීව - Antitrust Law)

මෘදුකාංග නිදහස් විය යුතුයි. Software should be free.

---

සටහන අපැහැදිලියි වගේ නම් සමාවෙන්න. ප්‍රශ්න තියෙනවනම් comemnt එකක් දාන්න.


Wednesday, November 12, 2008

Firefox සහ පෞද්ගලිකත්වය

මට හම්බ වුණා මරු Firefox add-on එකක්. නම TabRenamizer.

ඒක වැඩ කරන්නෙ මෙහෙමයි. අපි හිතමු මට බොසාට හොරෙන් Youtube වෙබ් අඩවියට යන්න ඕන වුණා කියල. ඒක අළුත් වින්ඩෝ එකක open කරල minimize කළොත් title bar එක පේනව. අළුත් tab එකක open කරල වෙනිං tab එකකට මාරු වුණත් tab title එක පේනව.

විසඳුම ඒ tab එකේ title එකේ පෙන්නන පාඨය (tab title text) වෙනස් කරන එක. ඒකට තමයි TabRenamizer තියෙන්නෙ.

Tab එක right click කරල rename කරන්න පුළුවන්. එතකොට tab එකේ තියෙන්නෙ Youtube. Tab title එක Wikipedia. පිටින් එබිල බලන කෙනෙකුට හිතෙන්නෙ හොඳ ළමයෙක් කියල. හික්.. :D

බලන්න Internet Explorer පාවිච්චි කරන අයට මේ වාසිය තියෙනවද කියල. Firefox අයට විතරයි චාන්ස් එක. ;)



Tuesday, November 11, 2008

සෝඩියම් කුට්ටිය

මට මතක් වුණා පාසල් යන කාලෙ පොඩි සිද්ධියක්. මම එතකොට 10 වසර. අපට තිබුණා විෂයයක් විද්‍යාව හා තාක්ෂණවේදය කියල. දැන් නං කොහොමද දන්නෑ. ඒකෙ තිබුණ පොඩි පරීක්ෂණයක් - මහ ලොකු දෙයක් නෙවෙයි. සෝඩියම් ලෝහය ජලයත් එක්ක වේගවත්ව ප්‍රතික්‍රියා කරන හැටි පෙන්නන්න. පොතේ තිබුණෙ වතුර බේසමකට මුං ඇටයක තරමේ සෝඩියම් කෑල්ලක් දාන්න කියල. හේතුව මේක තරමක භයානක වැඩක් නිසා.

---

අපේ පංතියෙ (10 B) තමයි ඇට්ටරයො ටික හිටියෙ. අපේ ඇට්ටර ගැන් එකේ එකෙක් දවසක් පාසල් විද්‍යාගාරයෙන් සෝඩියම් කුට්ටියක් හොරකම් කරල. රසායන ද්‍රව්‍ය ගබඩා කරල තියෙන කොටසට මොනම හේතුවක් මත වත් ශිෂ්‍යයින්ට යන්න දෙන්නෙ නෑ. ඒත් මේකා ගුරුවරුන්ටත් නොදැනී කොහොමහරි එතැනට ගිහින්!

---

අපේ කස්ටියට යෝජනාවලිය ගෙනාවම ඒක ඉහළින්ම සම්මත වුණා. ඒ දවස්වලම පරණ පොත්පත් වලින් සෝඩියම් වල ඉතිහාසය ගැන කියවල දැනගෙන තිබුණු නිසා මම වැඩේට විරුද්ධ වුණත් විරුද්ධතාව පෙන්නුවෙ නැහැ නෝන්ඩි වෙයි කියල බයට. ඒ සියල්ල පරයමින් නැග ආ කුතුහලය නිසා මමත් කස්ටිය යන තැනට හෙමින් සේන්දු වුණා. උස්සපු සෝඩියම් කෑල්ල රබර් ඇටයකට වඩා ටිකක් ලොකුයි. තව එකෙක් කොහෙන්ද මන්ද මළකඩ කාපු පොඩි නෙස්ටොමෝල්ට් ටින් එකක බාගයක් විතර පිරෙන්න වතුර අරගෙන ආව. අපි 15ක් විතර වටේට වට වුණා. මහමොළකාරය අර සෝඩියම් කුට්ටිය පිටින් වතුර එකට දැම්ම!!!

අපි කුතුහලයෙන් යුතුව බලාගෙන හිටිය. සෝඩියම් කුට්ටිය වතුර උඩ පාවෙමින් එහාට පැන්න - මෙහාට පැන්න - කහපාට දැල්ලක් දැම්ම - මහ හඬක් නගමින් පුපුරා ගියා. සියල්ලටම ගත වුණේ එක නිමේෂයයි. ටින් එක තිබුණු තැනක්වක් හොයාගන්න නෑ. කස්ටිය සී සී කඩ විසිර ගියා. හොඳ වෙලාවට කාටවත් අනතුරක් වෙලා තිබුණෙ නෑ.

---

පස්සෙ මේ වැඩේ කොහොම හරි ලීක් වෙලා තිබුණ. විද්‍යාගාරය භාර ගුරුතුමියගෙන් හොඳ හැටි අහගත්තා. දඬුවම වුණේ පාසල් විද්‍යාගාරය මාස හයකට තහනම් වීම. කොහොම වුණත් අන්තිමේ වැඩේ කස්ටියට මාර ආතල් එකක් ගෙන දුන්නා.

---

සිද්ධියෙ මහමොළකාරය ශිෂ්‍යත්වයක් ලැබිල දැන් ජපානයේ ඉංජිනේරු විද්‍යාව හදාරනව. ඔහු සමහරවිට බුද්ධි ගලනයට තවත් එක් උදාහරණයක් වේවි.


Monday, November 10, 2008

වෙන වැඩ නැතුවට...

Dialog HSDPA සම්බන්ධතාව පාවිච්චි කරන අය මේ මොකක්ද කියා දන්නවා. හැබැයි කාටවත් මේ වැඩේ වැදගත් කමක් ඇති කියල නම් මට හිතෙන්නෙ නැහැ. මේ තිර රූපසටහන ක්ලික් කරල හොඳට ඒ දිහා බලන්න.




Friday, November 7, 2008

ඇස්පනාපිට ලැබුණු අවවාදය

මම කැම්පස් එකට යන්නෙ-එන්නෙ ගෙදර (අම්බලන්ගොඩ) ඉඳලමයි. හවසට එන්නෙ සමුද්‍රදේවී දුම්රියෙ (වාර ප්‍රවේශපත්‍රය නිසා ගානක් නැහැ). අද කැම්පස් එකේ පොඩි වැඩ වගයක් තිබිල මට පිටත් වෙන්න පරක්කු වුණා. 154ක නැගල බම්බලපිටියට ගිහිල්ල බැහැපු ගමන් මම දිව්වෙ දුම්රිය ස්ථානය දිහාවට. කොහොම නමුත් මම දුම්රියට ළඟා වෙනකොට එය පිටත් වෙන්න ගමන් අරඹලා. කොහොම හරි නැගගන්න හිතුණත් දුම්රියේ වේගය වැඩි හින්ද මම නැග්ගෙ නෑ. ජීවිත කාලය කෙටි කරගන්නවත්, අනෙක් මගීන්ගේ විරුද්ධත්වය නොතකා එහෙම කරල 'පොර' වෙන්නවත් මට ඕන වුණේ නැති හින්දා මම විනාඩි 10ක් ඉඳල ඊළඟ දුම්රියේ ආව.

---

ඔන්න මම ආපු මන්දගාමී දුම්රිය හෙමින් හෙමින් ඇවිත් බෙන්තොටත් නතර කළා. මහන්සිය නිසා මම ඒ වෙලාවෙ හිටියෙ අඩ නින්දේ.

බෙන්තොටින් පිටත් වෙනකොටම මගීන්ගෙ කෑගැසීම නිසා මම උඩ ගිහින් බිම වැටුණ. ඒ කෑගැසීම කළේ කොහොම හරි රියදුරු ලවා දුම්රිය නවතන්න. මම ළඟ තිබුණු රතු පාට EMERGENCY SWITCH බොත්තම තද කළා -- කෝ එතන බොත්තමක් නෙවෙයි නිකන් සිදුරක් විතරයි (ඒ ගැන ඉතිං වෙනම කතා කරන්න ඕන). කොහොම හරි දුම්රිය තුළ හා දුම්රිය ස්ථානයෙ හිටපු මගීන්ගේ කෑගැසීම නිසා රියදුරු දුම්රිය නැවැත්තුවා. මේ සියල්ල සිදුවෙන්න ගත වුණේ එක නිමේෂයයි.

දුම්රිය ටික දුරක් ගිහින් නැවතුනා. දුම්රිය ගාඩ්වරයාත් මගීනුත් එකතු වෙලා දුම්රිය වේදිකාව අස්සට වැටුණු මනුස්සයව එළියට ගත්ත. ප්‍රාතිහාර්යයක් වගේ, ඔහු තවම පණපිටින්! සීරීමක් දෙකක් හැරෙන්න වෙන තුවාලයක් නැහැ.

සිද්ධිය මේකයි. ඔහුත් මං වගේම ප්‍රමාද වෙලා දුම්රියට ආපු කෙනෙක්. බෑග් එකකුත් එල්ලගෙන දුම්රිය‍ට නගින්න උත්සාහ කරද්දි බෑග් එක බිම (වේදිකාව මතට) වැටිලා. ඔහු නැවත බෑග් එකත් අතට අරගෙන දුම්රියට නගින්න උත්සාහ කරද්දි පය ලිස්සා දුම්රිය වේදිකාව අස්සට වැටිලා. (ඒ ප්‍රමාදයෙදි දුම්රියේ වේගය වැඩි වෙන බව ඔහුට එවෙලේ නිකමටවත් හිතිල නැහැ) කොහොම වුණත් වාසනාවට ඔහු බේරුණා.

---

මේ වගේ සිද්ධි ඇති තරම් වෙලා තිබුණත් අද මේ සිද්ධිය මගේ හිතේ පොඩි කැළඹීමක් ඇති කළා. අද මම හදිස්සි වුණා නම් මොකද වෙන්නෙ? හරියට මට ඇස්පනාපිටම ලැබුණු අවවාදයක් වගේ. කොහොම වුණත් අර මගියා බේරුණු එක නම් ලොකුම ලොකු දෙයක්.

බස්රිය, දුම්රිය මිස් වුණොත් ඊළඟ එකේ යන්න පුළුවන්. ඒත් ඔය වගේ මෝඩ වැඩ කරන්න ගියොත් වෙන්නේ ජීවිතයෙන් ඩිස්මිස් වෙන්න.



Wednesday, November 5, 2008

නිදහස සොයා - 1 | GNU/GPL වෙත ප්‍රවේශයක්

අද සටහනත් වෙන් වෙන්නෙ පරිගණක පිළිබඳ සාපේක්ෂව අඩු හෝ සාමාන්‍ය දැනුමක් තියෙන අය වෙනුවෙන්.

අපි පාවිච්චි කරන පරිගණක මෘදුකාංග අපට ලැබු€ණෙ කොහොමද? Software CD ටික ඉල්ලගන්නව යාළුවෙක්ගෙන් - නැත්තම් ඕනම CD එකක් රුපියල් 80ත් 200ත් අතර මුදලකට ගන්නවා - නැත්තම් Pirate Bay පිහිටෙන් - එහෙමත් නැත්තම් කාට හරි කියනව තමන්ගෙ පරිගණකයෙ මෘදුකාංග ටික ස්ථාපනය කරල දෙන්න කියල. මේ එක වෙලාවකවත් මේ වැඩේ නීත්‍යානුකූල බව ගැන හෙව්වද? දැන ගත්තත් ඒ ගැන අපි තැකීමක් කරනවද?

ඔන්න කොහෙන් හරි ගේනව Windows XP තැටියක්. ගෙනත් install කරනව. ටිකකින් මොකක්ද ඉංග්‍රීසියෙන් ලියපු වැල්වටාරමක් එනව. මොකද කරන්නෙ - ඔබනව F8. තමන්ගෙ සියළු චංචල - නිශ්චල දේපල Microsoft එකට පවරනව කියල තිබුණත් දන්නෑ. කියවන්නෙ නැහැනෙ අපේ අය.

හරි. දැන් එමු මාතෘකාවට. මම කිව්ව ඉංග්‍රීසි වැල්වටාරම කී දෙනෙක් සම්පූර්ණයෙන් කියවල තියෙනවද? මම නම් කියෙව්වා. කියවල නැත්තම් මෙතනින් කියවන්න [Windows XP, PDF]. eula.txt කියෙව්වම තේරුම් ගන්න පුළුවන් Microsoft ආයතනය Windows භාවිත කරන්නාට කොතරම් සීමා පනවල තියෙනවද කියල.

තමන්ට අවශ්‍ය විධියට වෙනස් කරගන්න බෑ. එක පරිගණකයක විතරයි පාවිච්චි කරන්න පුළුවන්. Decompile - ඒ කියන්නෙ වින්ඩෝස් ගොනු නැවත මූල කේත වලට හැරවීම (අඩුගානේ ආසාවට බලන්නවත්) සපුරා තහනම්. "The Product may not be used by more than two (2) processors at any one time on any single Workstation Computer" - මේ ගැන මොකද හිතන්නෙ? මේ වගේ කොන්දේසි රාශියකට අපව යටත් කරල තමයි ඔවුන් අපට මෘදුකාංග පාවිච්චි කරන්න දෙන්නෙ.

අනවසර පිටපත් පාවිච්චිය හා ළග තබා ගැනීම වැරදි වුණත් අනවසර පිටපතක් පාවිච්චි කරන කෙනාට ඕව වැදගත් නැහැනේ. දැන් බලමු නියමිත මුදල ගෙවල තමන්ගෙ පිටපත ලබාගන්න අය දිහා. ගෙවන මුදලත් එක්ක සංසන්දනය කරල හිතන්න මේ EULA (End User's License Agreement) එක කොයි තරම් දුරට සාධාරණද කියා. Microsoft පමණක් නොව අප එදිනෙදා පාවිච්චි කරන මෘදුකාංග බොහොමයක සත්‍ය තත්වය ඕකයි.

මගේ මතය තමයි මෘදුකාංග තමන්ට රිසි පරිද්දෙන් පාවිච්චි කිරීමේ නිදහස තිබිය යුතුයි කියන එක. මේක කවුරුවත් තෙල ගහල මගේ ඔළුවට ඇතුළු කරපු එකක් නෙවෙයි. හැබැයි විවිධ පුද්ගලයන් විසින් කළ දැනුවත් කිරීම් විවෘතව විමසා බලා හිතට ගත් දෙයක්. මම නිදහස උපරිමයෙන් අගයන්නෙක්.


මෙන්න නිදහස බලෙන් විඳීම (සංස්කරණය කළ logonui.exe):
මෙහි තිබූ තිර රූපසටහන ඉවත් කරන ලදී.
---

කොන්දේසි වලට හිර වෙන්න අකමැති නම්??? මෙන්න විසඳුම... නිදහස් හා විවෘත මෘදුකාංග හෙවත් Free and Open Source Software

නිදහස් (Free): පිටපත් කිරීම, සංස්කරණය කිරීම හා නැවත බෙදා හැරීම සඳහා නිදහස්
විවෘත (Open) : මූලය විවෘතයි. මෘදුකාංග සමග එහි මූල කේත (source code) ලබා ගත හැකියි

Ubuntu, Mozilla Firefox, Audacity මේ අතරින් කීපයක්. මදක් සිතා බලන්න, මේ නිදහස කෙතරම් අගනේද කියා...

මේ මෘදුකාංග වලත් license හෙවත් බලපත්‍ර ක්‍රමයක් තිබෙනවා. ඒ සඳහා විවිධ හේතු තිබෙනවා. BSD License, GNU General Public License, Apache License මේ අතරින් කීපයක්.

මම වැඩිපුර දැකල තියෙන්නෙ GNU/GPL යටතෙ දෙන නිදහස් හා විවෘත මෘදුකාංග. ඒ නිසා මම GNU/GPL වැඩිපුර උනන්දුයි. මම ඉදිරියෙදි GNU/GPL ගැන සටහනක් තියන්නම්.

GNU: GNU's Not Unix
GPL: General Public License

දැන් නවත්තන්නෙ නිදිමත නිසා... ප්‍රශ්න තියෙනව නම්/ මම වැරදි දෙයක් කියල නම් comment එකක් දාන්න.

Monday, November 3, 2008

සැඟවුණු චරිත සහ ආගිය කතා

මගේ Dialog HSDPA සම්බන්ධතාව එකපාරටම අවුල් වූණා. සම්බන්ධ වෙන්නෙ නෑ. පස්සෙ මම Dialog එක‍ට කතා කරල කිව්ව. දැන් නම් ටිකක් හරි වගේ. ඔන්න ඔය ජරමර ඉවර වුණාට පස්සෙ මට මූණුපොතෙන් හෝ ගාල ඇවිල්ල තිබුණු ඊමේල් කන්දරාව ඩිලීට් කරල දැම්ම. දැන් තමයි සිංහල බ්ලොග් ටික කියවල ඉවර කළේ. මේ අවුල නිසා මම (කල්පයක් වගේ) දවස් දෙකකට අන්තර්ජාලයෙන් වෙන් වුණා. ඒ අස්සෙ සෑහෙන විප්ලවයක් වෙලා.

පහුගිය දවස් වල මම තෙල ගහල සැඟවුණු සාමාජිකයො දෙන්නෙක් එළියට ගත්ත. එක්කෙනෙක් පහන්. අනිත් එක්කෙනා චමිල. තවත් කීප දෙනෙකුට බ්ලොග් තෙල ගසමින් පවතිනව. ඒ අයත් ඉදිරියෙදි සිංහල බ්ලොග් අවකාශයට එයි. අපේ කිරිකැටියා, වලේ ඇතුළුව කීපදෙනෙක්ම ඉන්නවා. මගේ බ්ලොග් එක වනමින් අවකාශයට ආයුබෝවන් කියූ චමිල දැන් සුපිරි ක්‍රීඩකයෙක්. කෝ ඉතින් මුන්ගෙ වැඩ කිඩ දැක්කෙ දැන්නෙ. :)

---

ඒ අස්සෙ මම xAurora එක්ක පොඩි සෙල්ලමක් දැම්ම. xaurora.exe සංස්කරණය කරල ඒකෙ comment විධියට තිබුණු hackerzmafia@gmail.com ඊමේල් ලිපිනය වෙනස් කරල ඒකට මගේ ඊමේල් ලිපිනය shaakunthala@gmail.com දැම්ම. දාල සේව් කළාම මෙන්න වැඩ! ඒක අහම්බෙන් වෙච්ච දෙයක් කියල දැනගත්තෙ අද උදේ කාලිංගගේ බ්ලොග් සටහන කියවද්දි.
  • hackerzmafia : 12 characters
  • shaakunthala : 12 characters
xAurora ගැන නම් ඉතින් කතා කරල වැඩක් නෑ. නන්නත්තාරයි.

---

තව ඉතින් කියන්න දෙයක් නෑ.. අද ටිකක් tech ගතිය අඩුයි වගේ.. තාවකාලික සමුගැන්ම.

~ ශාකුන්තල ~ Shaakunthala ~

Thursday, October 30, 2008

Spread IE8 ........ හුහ්!

Spread IE8 නම් අළුත් වෙබ් අඩවියක් ගැන මට දැනගන්න ලැබුණා. Mozilla Firefox ජනප්‍රිය වීමත් සමග දිනෙන් දින අසරණ වෙමින් පවතින Internet Explorer ගොඩ ගැනීමයි ඔවුන්ගේ අරමුණ. Microsoft India මගින් පවත්වාගෙන යන MeraWindows සංසදය විසිනුයි මෙය දියත් කර තිබෙන්නේ.



මොවුන් කර ඇත්තේ Firefox කොපි කිරීමක්. SpreadFirefox ඔබට මතක ඇති. SpreadIE8 වෙබ් අඩවියෙ ඉල්ලීමක් කර තිබෙනවා ඉහත දැක්වෙන ලාංඡන‍‍ය ඔබේ බ්ලොග් එකට/ වෙබ් අඩවියට එක් කරන්න කියා.

Microsoft වෙළඳ ඒකාධිකාරය ලොවට කර ඇති හදිය අමුතුවෙන් කියන්න ඕන නැහැනෙ. ඒ නිසා මම හැම දෙනාගෙන්ම ඉල්ලීමක් කරනව මේ ලාංඡනය පෙන්නල Microsoft එකට කඩේ යන්න එපා කියල.

---

මම මේ ලාංඡනය මෙතන පෙන්නන්නෙ Microsoft promote කරන්න නෙවෙයි. :)

Tuesday, October 28, 2008

GTalk සිංහල අක්ෂර සැකසීමේ (rendering) දෝෂ

අද ලියන සටහනේ ඇති දේ සමහර විට ඔබ දැනටමත් දන්නා දෙයක් වෙන්න පුළුවන්. නමුත් මට එය අද අහම්බෙන් හමුවූ නිසා අද සටහන වෙන් වෙන්නේ ඒ ගැන නොදන්න අයට එය කියා දෙන්න.

Google Talk මෘදුකාංගය භාවිතයෙන් සිංහල බසින් (සිංහල යුනිකේත භාවිත කර) පිළිසඳරේ යෙදී ඇත්නම් ඔබත් පහත දැක්වෙන ගැටළුවට මුහුණ පා ඇති.



එනම්, අකුරු අතර අනවශ්‍ය ලෙස හිස් තැන් දැක්වීමයි. පණිවුඩය යැවූ පසු මෙය නිවැරදිව දිස් වන නමුත් යතුරුලියනය කරන අවස්ථාවේ යුනිකේත නිවැරදිව දර්ශනය නොවීම මඳ අපහසුතාවයක් ඇතිකරයි. මෙය වළක්වා ගැනීමට පහත පියවර අනුගමනය කරන්න.

1. Google Talk හි ඉහළ දකුණුපස ඇති Settings ක්ලික් කරන්න.



2. General යටතේ ඇති Change Font බොත්තම ක්ලික් කරන්න.



3. Iskoola Pota අකුරු රටාව (font) තෝරන්න. එම අකුරු රටාවේ අක්ෂර මඳක් ප්‍රමාණයෙන් කුඩා නිසා අකුරු ප්‍රමාණය මඳක් වැඩි අගයකට (11 ප්‍රමාණවත්) සකසන්න.



දැන් හරි. හැබැයි ඉංග්‍රීසි අකුරු වල serif එක ටිකක් කරදරයක් වගේ. ඒත් සිංහල හරියට දිස් වෙනවනෙ. :)



---

Iskoola Pota අකුරු රටාව සිංහල යුනිකේත කට්ටලයත් සමඟ ලබා ගත හැකියි.

.

Sunday, October 26, 2008

සිංහල ධම්මපදය

ධර්ම දානය සියළු දානයන්ට වඩා උතුම් ය

මේ කියන්නෙ මෘදුකාංගයක් ලෙස එළිදැක්වෙන සිංහල ධම්මපදය ගැන. මෙය නිර්මාණය කරල තියෙන්නෙ කොළඹ විශ්වවිද්‍යාලයීය පරිගණක අධ්‍යයනායතනයෙ දෙවන වසර ශිෂ්‍යයෙක්. ඔහු නමින් සම්පත් බණ්ඩාර. මගේ මිත්‍රයෙක්.

මෙම මෘදුකාංගයෙ අතුරුමුහුණතත් අන්තර්ගතයත් සකස් කරල තියෙන්නෙ සිංහල භාෂාවෙන්. හැබැයි මෙය නිර්මාණය කරල තියෙන්නෙ Microsoft Visual Basic 6.0 භාවිතයෙන් නිසා සිංහල යුනිකේත භාවිත කරල නැහැ. ඉදිරියෙදි මෙය Visual Basic .NET මගින් නැවත සකසන්න අදහසක් තිබෙනවා. එවිට සිංහල යුනිකේත භාවිත කරන්න පුළුවන් වේවි.

මෙහි ගාථා සහ තේරුම සිංහල බසින් කියවන්නත් ශ්‍රවණය කරන්නත් පහසුකම් සලසා දී තිබෙනවා. මෙය නිර්මාණය කිරීමේදී UCSC දෙවන වස‍රෙ සුලක්ෂිකා වීරතුංග, නිරන්දිකා වනිගසේකර සහ පහන් සරත්චන්ද්‍ර යන අයත් දායක වුණා.

මෙම මෘදුකාංගයේ බීටා නිකුතුව දැනට සීමිත පිරිසක් අතර බෙදා හැර තිබෙනවා. ඉදිරි කාලයේදි මෙය අන්තර්ජාලය හරහා භාගත කරගත හැකි වේවි.

පහත දැක්වෙන්නෙ බීටා සංස්කරණයෙ තිරපිටපත්.





.

Saturday, October 25, 2008

රෙද්ද උස්සා බැලීම

රෙද්ද උස්සා බැලීම




---



මොකක් කියලද හිතුවෙ? :D

Friday, October 24, 2008

අළුත් වයිරස් නාශකයක්

මම කලින් පාවිච්චි කළේ AVG Antivirus නොමිලේ දෙන සංස්කරණය. AVG 8 සංස්කරණය නිකුත් කළාට පසුව මට ඒක එතරම් හරි ගියේ නැහැ. ඒකට හේතු වුණේ AVG 7 ට වඩා AVG 8 මන්දගාමී වීම.
මම ඒ නිසා වෙන විසඳුමක් හෙව්වා. හම්බ වුණා. :)

Avast Antivirus. Avast ලැබෙන්නෙත් නොමිලේ. හැබැයි Home Release License කේතයක් ඔවුන්ගෙ වෙබ් අඩවියෙ ලියාපදිංචි වෙලා ලබා ගන්න වෙනවා.

මෙයින් පරිගණකය AVG තරම් මන්දගාමී වෙන්නෙ නෑ. පද්ධති සම්පත් භාවිතා වෙන්නෙ අවම මට්ටමින්.





මෙහි රිසිකරණ විකල්ප (options) බොහොමයක් සලසා දී තිබෙනවා. Network, Standard, IM, Internet Mail, P2P (Peer to Peer), Web ලෙස වෙන වෙනම ක්‍රියාත්මක වන මොඩියුල හයකින් මෙහි resident shield එක සමන්විතයි. මේ මොඩියුල හය තමන් කැමති විධියට වෙන වෙනම රිසිකරණය කළ හැකියි. අත්‍යවශ්‍ය දෙයක් නොවුණත් මෙයට themes යෙදීමේ පහසුකමද සලසා තිබෙනවා.

USB devices වල තියෙන වයිරස් සෙවීමේදි avast, AVG වලට වඩා කාර්යක්ෂමයි කියල මට නම් හිතෙන්නෙ.

Wednesday, October 22, 2008

කුප්පිය

ආම්මෝ දැං තමයි යාංතං ඇඟට ලේ ටිකක් ඉනුවේ. උදේ අටට deadline දාල තියෙන පැවරුම දැන් තමයි upload කළේ.

ඒ අතරෙ මරු වෙබ් අඩවියක් සෙට් වුණා.
මේකෙන් බාගන්න පුළුවනි වීඩියෝ ලෙස සකස් කරන ලද පරිගණක පාඩම් (AJAX, PHP වගේ දේවල්). සකස් කරල තියෙන්නෙ සිංහල මාධ්‍යයෙන්. මම නම් අහු වෙච්ච ඔක්කොම බෑවා. මරේ මරු. මට නම් හොඳයි. ඒක කුප්පියක්ම තමයි. :D

දැං නිදිමතයි. මං යනවා.

Tuesday, October 21, 2008

වයිරස් වලින් පරිස්සම් වෙන්න

පරිගණක වයිරස ගැන බොහෝ දෙනා දන්නවනෙ. මේව පැතිරෙන එක් සුලභ ක්‍රමයක් තමයි USB දත්තගබඩා උපාංග (USB data devices හෙවත් ‍pen drives). බොහෝ විට පිටතින් රැගෙන එන මෙම උපාංගයක් ගෙදර පරිගණකයට සම්බන්ධ කළාම අපටත් නොදැනිම වයිරසය පරිගණකය ඇතුළට රිංගනවා. කොහොමද අපි මේක වලක්වා ගන්නෙ? මේ ඒ ගැන පොඩි සටහනක්.

USB දත්ත උපාංග දෙක්ලික් (double click) කර විවෘත කරන්න එපා. (දැනටමත් බොහෝ දෙනා මෙය දන්නවා)


USB දත්ත උපාංගය දකුණු-ක්ලික් (right click) කර දිස්වන මෙනුව ප්‍රවේශමෙන් නිරීක්ෂණය කරන්න.

මෙහි 'Open', 'Explore' වැනි මෙනු අයිතම අහිංසක ආකාරයෙන් දිස්වුවත් සමහරවිට එම මෙනු අයිතමත් autorun.inf මගින් ආක්‍රමණය කර තිබෙන්නට පුළුවනි. ඒ නිසා එම මෙනු අයිතම ක්ලික් කිරීමෙන් වලකින්න.


USB උපාංගය විවෘත කිරීමට පහත පියවර අනුගමනය කරන්න. මේ විධියට විවෘත කරන්න පුරුදු වුණාට පසුව තවම මගේ පරිගණකය වයිරස් මගින් ආසාදිත තත්වයට පත් වෙලා නෑ.

පියවර 1


පියවර 2


---

මා දැන් කියූ ක්‍රමය ආරක්ෂිතයි. ඒත් කවදා වෙනකන්ද? ඒක මට සැකයි.
වයිරස් ප්‍රශ්න වලින් තොර Linux මෙහෙයුම් පද්ධති වෙත මාරු වීම එක් හොඳ විසඳුමක්.

~ ශාකුන්තල ~

Sunday, October 19, 2008

Sri Lanka Flag Screen Saver

මේක මම 2007 අවුරුද්දෙ Visual Basic 6.0 භාවිත කරමින් කළ නිර්මාණයක්. මම මෙහෙම දෙයක් කරන්න හේතු වුණේ මීට කලින් මේ වගේ ‍නිර්මාණයක් දැක නොතිබීම. සජීවීකරණය Macromedia Flash වලින් හදපු එකක්. මම ග්‍රැෆික් නිර්මාණකරණයේ එතරම් දක්ෂයෙක් නොවන නිසා ඒක හිතපු තරම් ලස්සනට හදන්න බැරි වුණා.
Screen Saver නිර්මාණය කරන්න පුළුවන් මෘදුකාංග වෙනම තිබුණත් ඒවායින් හදන screen savers වල කොතැනක හරි ඒ මෘදුකාංගයේ නම සඳහන් වෙනවා (Created with @#$%^^). ඒ වගේම ප්‍රකාශන හිමිකම් සඳහන (Copyright Notice) බලන්න. නමුත් මේ screen saver එකේ එහෙම වෙනත් මෘදුකාංගයකින් නිර්මාණය කරපු බවක් දක්වල නෑ.


---

Linux සඳහා screen savers නිර්මාණය කරන්නෙ කොහොමද කියල මම මේ දවස් වල හොයනව. දැනගත්ත දවසක මේක මම නැවත Linux සඳහා නිර්මාණය කරල බෙදාහරිනව GNU/GPL යටතේ.

---








~ ශාකුන්තල ~

මේ දවස්

මේ දවස් වල එක පාරටම වැඩ වැඩි වුණා. දැන් දවස් දෙකක්ම මොනවත් ලිව්වෙත් නෑ.
Assignments, reports, presentations ඒ ඇරුණම බාරගත්ත බාහිර වැඩ මතක් වෙනකොට නවදොරම එකසැරේට විවුර්ත වෙනවා.

බලමු, මේක තාවකාලික සමුගැන්මක් වේවිද මන්දා...

Wednesday, October 15, 2008

I DNT HATE MOZILLA BUT USE IE OR ELSE...

මේ සටහන ලියන්නෙ කවුරු හරි මේ ගැන නොදන්න කෙනෙක් මේක කියවලා යම් දෙයක් අළුතෙන් ඉගෙන ගනීවි යන අදහසින්.
හැම virus එකම virus scanner එකට අහු වෙන්නෙ නෑ. ඒකට විවිධ හේතු බලපානව. Virus scanner වලින් මේවා සුද්ධ කළත් සමහර කොටස් ඉතිරි කරල තමයි සුද්ධ කරන්නෙ. ඒ නිසා අපිත් ඒ ගැන සෙවිල්ලෙන් ඉන්න ඕනා. මේ සටහනෙන් විස්තර කරන්නෙ තමන් විසින්ම පියවරෙන් පියවර virus එකක් ඉවත් කරන ආකාරයයි.

---

අද කැම්පස් එකේ computer එකකින් ඉන්ටර්නෙට් යන්න සුපුරුදු විධියට Firefox start කළා. මෙන්න එකපාරටම Firefox වින්ඩෝ එක අතුරුදන් වෙලා ආවා මෙහෙම එකක්.


---

මේක virus එකක්. මොකද දන්නෑ මෙයා අපට Firefox පාවිච්චි කරන්න එපා කියන්නේ. IE පාවිච්චි කරන එක මට නිකං මදිකමක් වගේ. මම ටිකක් කල්පනා කරල බැලුව මේක හදා ගන්න විධියක්. මේකෙ admin මම නෙවෙයි වුණත් මම පටන් ගත්තා සටන.

මේ සටහනේ මීළඟට තියෙන තිරපිටපත් වලින් පෙන්වන්නෙ මැච් එකේ highlights ටික.

මුලින්ම Windows Task Manager වලින් virus එකට අදාළ ස්වයංක්‍රියාකාරී (exe) ගොනුව සොයාගන්න.

මේක Generic Host Process for Win32 Services (svchost.exe) කියන ක්‍රමලේඛයේ නමින්මයි ක්‍රියාත්මක වෙන්නේ. මේකේ පිටපත් කීපයක් එකවර ක්‍රියාත්මක වෙනවා වෙන්නත් ඇති. ඒක හොයාගන්න ක්‍රමයක් නැති නිසා මම මෙහෙම කළා.
Start --> Run ගිහින් cmd.exe කියන විධානය ලබා දුන්නා.

ඊට පසුව පහත දැක්වෙන විධානය ලබා දුන්නා. (පරිස්සමෙන්!!! Admin account එකක ඉඳගෙන මේ විධානය දෙන්න එපා. එහෙම කළොත් තත්පර 30කින් පරිගණකය restart වේවි)
TASKKILL.EXE /F /IM SVCHOST.EXE



දැන් අමාරුකාරයව නවත්තලා ඉවරයි කියල හිතමු. ඒත් virus වල ගතිය‍නේ පරිගණකය start වෙනවත් එක්කම start වෙන එක. මම ඒකත්‍ හොයල බැලුව. මුලින්ම බැලුවෙ registry එකේ.
HKEY_LOCAL_MACHINE\SOFTWARE\Microsoft\Windows\CurrentVersion\Run
HKEY_CURRENT_USER\SOFTWARE\Microsoft\Windows\CurrentVersion\Run
මේ තැන් මම පරීක්ෂා කරල බැලුව.

එහෙ කිසිම හෝඩුවාවක් නෑ. ඊළඟට බැලුවෙ Start --> All Programs --> Startup. මෙන්න බඩු!!!

ඇහැ රවටන ආකාරයට ඒක හදල තියෙනවා. ඊළඟ පියවර ටිකත් බලන්න.

පේනව නේද පොර හැංගිලා ඉන්න තැන.

දැන් සියල්ල හරි. සෝට්කට් එකත් අයිං කරමු.


ඔන්න දැං හරි!!!


ගැටළු තියෙනවනම් comment එකක් දාන්න.

~ ශාකුන්තල ~